Brailvi Books

فیضانِ اِحیاءُ العُلوم

302 - 325

ان کے خیال میں اﷲ (عزوجل) کے لئے محبت اور اﷲ (عزوجل) کے لئے دشمنی کا تقاضا یہی ہے۔ حضرت سیدنا ابودرداء اور صحابہئ کرام ثکی ایک جماعت نے اس کے خلاف موقف اختیار کیا ہے حضرت ابو درداء (رضی اﷲ تعالیٰ عنہُ) فرماتے ہیں جب تمہارے دوست کی حالت بدل جائے اور وہ پہلی حالت سے پھر جائے تو اس وجہ سے اسے نہ چھوڑو کیونکہ تمہارا بھائی کبھی ٹیڑھے راستے پر چلے گا کبھی سیدھے راستے پر آجائے گا۔

حضرت ابراہیم نخعی (رضی اﷲ تعالیٰ عنہُ) فرماتے ہیں ''گناہ کی وجہ سے اپنے بھائی سے قطع تعلق نہ کرو اور نہ اسے چھوڑو کیونکہ آج وہ گناہ کرتا ہے تو کل اسے چھوڑ دے گا ۔ انہوں نے یہ بھی فرمایا عالِم کی لغزش کا کسی سے ذکر نہ کرو کیونکہ عالم لغزش کرتا ہے پھر اسے چھوڑ دیتا ہے۔''

حدیث شریف میں ہے :

اِتَّقُوْا زَلَّۃَ الْعَالِمِ وَلاَ تَقْطَعُوْہُ وَانْتَظِرُوْا فَیْئَتَہ'۔

''عالم کی لغزش سے ڈرو اور اس سے تعلقات منقطع نہ کرو بلکہ اس کے رجوع کا انتظار کرو'' (الکامل لابن عدی جلد ۶ ص ۲۰۸۱ من اسمہ کثیر)

حضرت سیدنا عمر فاروق (رضی اﷲ تعالیٰ عنہُ) کی ایک روایت میں ہے آپ (رضی اﷲ تعالیٰ عنہُ) نے ایک شخص کو اپنا بھائی بنایا تھا وہ شام کی طرف چلا گیا جب ایک شخص شام سے آیا تو آپ (رضی اﷲ تعالیٰ عنہُ) نے اس کے بارے میں پوچھا اور فرمایا میرے بھائی کا کیا حال ہے ؟ اس نے کہا وہ تو شیطان کا بھائی ہے آپ (رضی اﷲ تعالیٰ عنہُ) نے فرمایا کیوں ؟ اس نے کہا اس نے بہت کبیرہ گناہ کئے حتی کہ شراب نوشی میں مبتلا ہوگیا آپ (رضی اﷲ تعالیٰ عنہُ )نے فرمایا جب جانے لگو تو مجھے بتانا چنانچہ جب وہ جانے لگا تو آپ (رضی اﷲ تعالیٰ عنہُ) نے ایک خط لکھا جس میں آپ(رضی اﷲ تعالیٰ عنہُ ) نے یوں لکھا۔