ترجمہ کنزالایمان ''اور جب جاہل ان سے بات کرتے ہیں تو کہتے ہیں بس سلام'' (پارہ نمبر۱۹' سوره فرقان آیت ۶۳)
یہاں لفظ '' سلاماً '' میں الف ، ہا سے بدل کر آیا ہے یعنی '' سلامۃ '' ہے مطلب یہ ہے کہ ہم تمہارے گناہ سے محفوظ رہیں اور تم ہمارے شر سے محفوظ رہو۔
اور جہاں تک حریص کا تعلق ہے تو اس کی صحبت زہر قاتل ہے ۔کیونکہ انسانی فطرت ہے کہ و ہ دوسروں کی مشابہت اختیار کرتا اوران کی اقتداء کرتا ہے۔ بلکہ ایک طبیعت دوسری طبیعت سے ضرور کچھ نہ کچھ حاصل کرتی ہے جس کا اسے علم نہیں ہوتا ۔تو دنیا کی حرص رکھنے والے کی مجلس اختیار کرنا حرص کو حرکت دینا ہے۔ اور زاہد کی مجلس دنیا سے بے رغبت کردیتی ہے اسی لئے دنیا کے طالب لوگوں کی صحبت مکروہ ہے اور آخرت کی رغبت رکھنے والوں کی مجلس مستحب ہے ۔
لہٰذا حضرت سیدنا علی المرتضی (رضی اﷲ تعالیٰ عنہُ) نے فرمایا:
''ان لوگوں کے پاس بیٹھ کر عبادات کو زندہ کروجن سے حیا ء کی جا تی ہے ''۔
حضرت سیدنا امام احمد بن حنبل (رضی اﷲ تعالیٰ عنہُ) نے فرمایا '' مجھے ایسے لوگوں کی صحبت نے آزمائش میں ڈالا جن سے میں جھجکتا نہیں تھا ''۔
