Brailvi Books

میٹھے میٹھے اسلامی بھائیو! سیدنا امام غزالی علیہ رحمۃ الباری (رضی اﷲ تعالیٰ عنہُ) کچھ اس طرح فرماتے ہیں۔

اﷲ (عزوجل) کے لئے محبت اور اس کے لئے دشمنی ایک مشکل بات ہے' ہم جو کچھ ذکر کریں گے اس کے ذریعے بات واضح ہوجائے گی ۔ 

صحبت کی اقسام:

صحبت کی دو قسمیں ہیں' ایک وہ جو اتفاقاً ہوجاتی ہے جیسے پڑوسی ہونے کے باعث کسی مکتب میں یا مدرسہ یا بازار میں یا بادشاہ کے دروازے پر یا سفر میں اکٹھے ہونے سے۔

دوسری وہ جو اپنے اختیار اور ارادے سے اپنائی جاتی ہے۔ ہم اسے ہی بیان کرنا چاہتے ہیں۔ کیونکہ دینی بھائی چارہ اسی قسم میں شامل ہے اس لئے کہ ثواب ان کاموں پر ملتا ہے جو انسان اپنے اختیار سے کرتا ہے صحبت کا مطلب ایک دوسرے کا ہم مجلس ہونا' آپس میں ملنا جلنا اور پڑوسی بننا ہے اور آدمی کسی دوسرے کے لئے یہ باتیں تب ہی چاہتا ہے جب اس سے محبت کرتا ہے کیونکہ جس سے محبت نہ ہو اس سے دوری اختیار کی جاتی ہے' اس سے میل جول کا قصد نہیں کیا جاتا ۔