اس کی وجہ یہ ہے کہ امید اور خوف کی ایک شرط یہ ہے کہ ان دونوں کا تعلق اس چیز کے ساتھ ہوتا ہے جس میں شک ہو کیونکہ جو چیز یقینی ہو اس کی نہ تو امید ہوتی ہے اور نہ ہی خوف۔ پس وہ پسندیدہ شے جس کے ملنے کا امکان ہو اس کے فوت ہونے کا امکان بھی ہوتاہے پس اس کو پانے کا خیال دل کو راحت پہنچاتا ہے اور یہی امید ہے نیز اس کے ضائع ہونے کا اندیشہ دل کو پریشان کرتا ہے اور اسی کو خوف کہتے ہیں اور جب وہ بات جس کا انتظار کیا جا ئے مشکوک ہو تو دونوں امکانات لازماً ایک دوسرے کے مقابل ہوتے ہیں ہاں شک کی دو طرفوں میں سے ایک' بعض اوقات کسی سبب کی وجہ سے راجح ہوتی ہے اور اسے ظن کہتے ہیں اور یہ بات' اس وقت ہوگی جب ایک خیال دوسرے پر غالب آجائے ۔
بہرحال جب پسندیدہ شے کے ملنے کا گمان غالب ہو تو امید قوی ہوجاتی ہے اور خوف پوشیدہ ہوجاتا ہے اور اسی طرح اس کے برعکس بھی ہوتا ہے اور دونوں صورتوں میں یہ دونوں ایک دوسرے کیلئے لازم و ملزوم ہیں اسی لئے اﷲ تعالیٰ نے ارشاد فرمایا۔
