Brailvi Books

حضرت ابو امامہ رضی اللہ تعالیٰ عنہ سے مروی ہے، فرماتے ہيں: آقائے مظلوم، سرورمعصوم، حسن اخلاق کے پیکر،نبیوں کے تاجور، محبوب ر ب اکبر صلی اللہ تعالیٰ علیہ وسلم نے فرمايا: اے ابن آدم! بچے ہوئے کا خرچ کرنا تيرے لئے بہتر ہے اور اس کا روکنا تيرے لئے بُرا ہے اور بقدر ضرورت روکنے پر ملامت نہیں اوران سے شروع کر جو تیری پرورش میں ہیں اور اوپر والا ہاتھ نيچے والے ہاتھ سے بہتر ہے۔ 

    مفتی احمدیار خان نعیمی رحمۃ اللہ تعالیٰ علیہ اس حدیث کی شرح میں فرماتے ہیں: يعنی اپنی ضروريات سے بچا ہوا مال خرچ کردينا خود تيرے لئے ہی مفيد ہے کہ اس سے تيرا کوئی کام نہ رُکے گا اور تجھے دنيا وآخرت ميں عوض مل جائے گا، اور اسے روکے رکھنا خود تيرے لئے ہی بُرا ہے کيونکہ وہ چيز سڑ گل يا اور طرح ضائع ہوجائے گی اور تُو ثواب سے محروم ہوجائے گا، اسی لئے حکم ہے کہ نيا کپڑا پاؤ تو پرانا کپڑا خيرات کردو، نيا جوتا رب تعالیٰ دے تو پرانا جوتا جو تمہاری ضرورت سے بچا ہوا ہے کسی فقير کو دے دو کہ تمہارے گھر کا کوڑا نکل جائے گا اور اُس کا بھلا ہوجائے گا۔۲؎