اپنے اسلاف سے عقیدت ومحبت کا تعلق ایمان کی مضبوطی کا ذریعہ ہے ۔ اس لئے والدین کو چاہيے کہ اپنے بچوں کے دل میں صحابہ کرام واہل بیت رضی اللہ تعالی عنہم کی عقیدت پیدا کریں ۔ اس کے لئے بچوں کو ان نفوس قدسیہّ کی سیرت کے نورانی واقعات سنائيے ۔
حضرت سیدنا عبداللہ بن مغفل رضی اللہ تعالیٰ عنہ سے مروی ہے کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَر صلَّی اللہ تعالیٰ علیہ واٰلہٖ وسلّم نے ارشاد فرمایا:''میرے صحابہ کے بارے میں اللہ عزوجل سے ڈرو ،میرے بعد انہیں نشانہ اعتراض نہ بنانا ، جس نے ان سے محبت رکھی تو اس نے میری محبت کے سبب ان سے محبت رکھی اور جس نے ان سے بغض رکھا تو اس نے مجھ سے بغض کے سبب ان سے بغض رکھا اور جس نے انہیں اذیت دی اس نے مجھے اذیت دی اور جس نے مجھے اذیت دی اس نے اللہ تعالیٰ کو اذیت دی ،قریب ہے کہ اللہ تعالیٰ اسے اپنی گرفت میں لے لے ۔''