Brailvi Books

سیرتِ مصطفٰی صلی اللہ تعالی علیہ وسلم

338 - 872

حضرت زبیررضی اللہ تعالیٰ عنہ کوخطاب ملا

حضور صلی اﷲ تعالیٰ علیہ وسلم نے جنگ خندق کے موقع پر جب کہ کفار مدینہ کا محاصرہ کئے ہوئے تھے اور کسی کے لئے شہر سے باہر نکلنا دشوار تھاتین مرتبہ ارشاد فرمایا کہ کون ہے جو قوم کفار کی خبر لائے؟ تینوں مرتبہ حضرت زبیر بن العوام رضی اﷲ تعالیٰ عنہ نے جو حضور صلی اﷲ تعالیٰ علیہ وسلم کی پھوپھی حضرت صفیہ رضی اﷲ تعالیٰ عنہا کے فرزند ہیں یہ کہا کہ ''میں یا رسول اﷲ!( صلی اﷲ تعالیٰ علیہ وسلم)خبر لاؤں گا۔'' حضرت زبیر رضی اﷲ تعالیٰ عنہ کی اس جان نثاری سے خوش ہو کر تاجدار دو عالم صلی اﷲ تعالیٰ علیہ وسلم نے فرمایا کہ

لِکُلِّ نَبِیٍّ حَوَارِیٌّ وَّاِنَّ حَوَارِیَّ الزُّبَیْرُ (بخاری ج۲ ص۵۹۰)

ہرنبی کے لئے حواری(مددگارخاص)ہوتے ہیں اور میرا ''حواری'' زبیر ہے۔

اسی طرح حضرت زبیررضی اﷲ تعالیٰ عنہ کوبارگاہ رسالت سے ''حواری'' کا خطاب ملاجو کسی دوسرے صحابی کو نہیں ملا۔(1)

اس جنگ میں مسلمانوں کا جانی نقصان بہت ہی کم ہوایعنی کل چھ مسلمان شہادت سے سرفرازہوئے مگر انصار کا سب سے بڑا بازو ٹوٹ گیایعنی حضرت سعد بن معاذ رضی اﷲ تعالیٰ عنہ جو قبیلہ اوس کے سردار اعظم تھے،اس جنگ میں ایک تیر سے زخمی ہو گئے اور پھر شفا یاب نہ ہو سکے۔(2)

1۔۔۔۔۔۔صحیح البخاری،کتاب المغازی،باب غزوۃ الخندق،الحدیث:۴۱۱۳،ج۳،ص۵۴ 2۔۔۔۔۔۔المواھب اللدنیۃ مع شرح الزرقانی، باب غزوۃ الخندق...الخ وباب غزوۃ بنی قریظۃ، ج۳،ص۴۳،۸۹ ملتقطاً وملخصاً