Brailvi Books
 |
سرکار کا پیغام عطّار کے نام |
15 - 49
میٹھے میٹھے اسلامی بھائیو! اِس حِکایت سے اِحْتِرامِ مُسلِم کی اَہَمِّیَّت کا بخوبی اندازہ لگایا جاسکتا ہے کہ شرِیْعَت کے دائرہ میں رہتے ہوئے مسلمان کی پردہ پوشی کی جائے یہ نہ ہو کہ بے سبب اُس پر بد گُمانی کا دروازہ کھول کر اُسے جُھوٹا اورگَپّی وغیرہ قرار دے کر اپنی آخِرت کو داؤ پر لگاتے ہوئے خود مَعاذَ اللہ جَہنَّم کا حقدار بنادیا جائے۔
جھوٹا خواب بیان کرنے والے کا انجام
بِالفرض کوئی جھوٹا خواب گڑھ کر سناتا بھی ہے تواِس کا وہ خود ہی ذمّہ دار، سخت گنہگار اور عذابِ نار کا حقدارہے ، اللہ عَزَّوَجَلَّ کے مَحْبوب، دانائے غُیُوب، مُنَزَّہ'' عَنِ الْعُیُوب صلی اللہ تعالیٰ علیہ واٰلہٖ وسلم کا فرمانِ عبرت نشان ہے، ''جو جھوٹا خواب بیان کرے اُسے بَروزِ قِیامت جَو کے دو دانوں میں گانٹھ لگانے کی تکلیف دی جائیگی اور وہ ہر گز گانٹھ نہیں لگاپائے گا۔''
(صحیح بخاری ج ۷ ص ۱۰۶ حدیث ۷۰۴۲)