Brailvi Books

    حضرت انس رضی اللہ تعالیٰ عنہ کے صحیفہ اخلاق میں حب رسول صلی اللہ تعالیٰ علیہ والہٖ وسلم اور اتباع سنت کے نہایت نمایاں ابواب ہیں انھوں نے ہوش کی آنکھیں کھولیں تو اسلام کو اپنے گھرانے پر شروع دن ہی سے پر تو فگن دیکھا۔ ان کی والدہ حضرت ام سلیم ، سوتیلے والد حضرت ابو طلحہ، چچا حضرت انس بن نضر ، بھائی حضرت براء بن الملک، خالہ ام حرام اور سبھی سروردو عالم صلی اللہ تعالیٰ علیہ والہٖ وسلم کے مخلص شیدائی تھے۔(رضی اللہ تعالیٰ عنہم اجمعین) 

    خاندان میں ہر وقت ذات رسالتمآب صلی اللہ تعالیٰ علیہ والہٖ وسلم اور آپ کی دعوت حق کا چرچا ہوتا رہتا تھا۔اس پاکیزہ ماحول نے کمسن انس رضی اللہ تعالیٰ عنہ کے دل میں حضور پر نور صلی اللہ تعالیٰ علیہ والہٖ وسلم کی محبت کا بیج بودیا ۔ اس کے بعد ان کو مسلسل دس برس تک رحمت دو عالم صلی اللہ تعالیٰ علیہ والہٖ وسلم کی خدمت کر نے کی سعادت نصیب ہوئی۔ اس دوران، ان کو حضور صلی اللہ تعالیٰ علیہ والہٖ وسلم کے بے مثل اخلاق عالی نے اتنا متاثر کیا کہ وہ اپنے شفیق آقاو مولا صلی اللہ تعالیٰ علیہ والہٖ وسلم کے عاشق صادق بن گئے۔