Brailvi Books

    حضرت سلمان فارسی رضی اللہ تعالیٰ عنہ نے اس نصیحت کو پیش نظر رکھا اورملک عرب کی طرف رخ  کیا جونہی وہ مدینہ پہنچے تو آنحضرت صلی اللہ تعالیٰ علیہ واٰلہٖ وسلم ہجرت کرکے قبا تشریف لاچکے تھے۔ سلمان آپ صلی اللہ تعالیٰ علیہ واٰلہٖ وسلم کی خدمت میں کچھ چیزیں لیکر حاضر ہوئے او ر حضور صلی اللہ تعالیٰ علیہ واٰلہٖ وسلم سے عرض کیا: یہ صدقہ ہے ، حضور قبول فرمائیے! آنحضرت صلی اللہ تعالیٰ علیہ واٰلہٖ وسلم نے صحابہ رضی اللہ تعالیٰ عنہم سے فرمایا :تم کھالو لیکن خود نہ کھایا۔ حضرت سلمان نے دل میں کہا ایک نشانی تو پوری ہوگئی۔ سلمان رضی اللہ تعالیٰ عنہ کہتے ہیں بعد ازاں میں صحابہ رضی اللہ تعالیٰ عنہم کی جماعت میں مل گیا۔ جب آپ صلی اللہ تعالیٰ علیہ واٰلہٖ وسلم قبا سے مدینہ تشریف لائے تو میں کچھ چیزیں لیکر حاضر خدمت ہو ا اور عرض کی! حضور یہ ہدیہ ہے قبول فرمائیے۔ آپ صلی اللہ تعالیٰ علیہ واٰلہٖ وسلم نے صحابہ رضی اللہ تعالیٰ عنہم کیساتھ مل کر کھالیا۔ میں نے اپنے آپ سے کہا دو علامتیں پوری ہوگئیں۔