Brailvi Books

صحابہ کِرام کا عشقِ رسول

174 - 273

  آپ صلی اللہ تعالیٰ علیہ والہ وبارک وسلم کی خدمت میں گزارش کی کہ آپ صلی اللہ تعالیٰ علیہ والہ وبارک وسلم اوپر قیام فرمائیں۔ ارشاد ہوا کہ نیچے کا حصہ ہمارے لئے زیادہ موزوں ہے۔

    ایک روایت میں ہے حضرت ابو ایوب رضی اللہ عنہ برابر اس بات پر مصر رہے کہ حضور صلی اللہ تعالیٰ علیہ والہ وسلم اوپر کی منزل میں رہیں اورخود نچلی منزل میں رہیں۔ 

     بولے کہ جس چھت کے نیچے آپ صلی اللہ تعالیٰ علیہ والہ وبارک وسلم ہوں ہم اس پر نہیں چڑھ سکتے،لہذا آپ صلی اللہ تعالیٰ علیہ والہ وبارک وسلم نے بالا خانہ پر قیام فرمایا۔

(مدارج النبوت،قسم دوم، باب چہارم،بیان قضیۂ ہجرت آنحضرت ،ج۲، ص۶۵)

    بعض صحابہ رضی اللہ تعالیٰ عنہم آپ صلی اللہ تعالیٰ علیہ وآلہٖ وسلم سے سن میں بڑے تھے، لیکن ان کو فرط ادب سے یہ گوارانہ تھا کہ ان کو آپ سے بڑا کہا جائے۔ 

    ایک بار حضرت عثمان رضی اللہ عنہ نے ایک صحابی رضی اللہ تعالیٰ عنہ سے پوچھا آپ بڑے ہیں یارسول اللہ عزوجل و صلی اللہ تعالیٰ علیہ وآلہٖ وسلم؟ بولے بڑے تو رسول اللہ عزوجل و صلی اللہ تعالیٰ علیہ وآلہٖ وسلم ہیں، البتہ میں آپ صلی اللہ تعالیٰ علیہ وآلہٖ وسلم سے پہلے پیدا ہوا۔