ہر اسلامی بھائی کو چاہے کہ اپنے منہ میاں مٹھو بن کر نفس وشیطان کے جال میں پھنسنے سے بچے کیونکہ نفس بڑا دھوکے باز ہے، شیطان بھی تاک میں رہتا ہے اور جاہ ومرتبہ کی خواہش دل پر غالب رہتی ہے او رظاہر ی اعمال آفات سے بہت کم محفوظ رہتے ہیں اور عمل کی سلامتی اِسے پوشیدہ رکھنے میں ہے۔ جب اس کے اظہار میں ایسے خطرات ہیں جن سے مقابلے کی قوت ہم جیسوں کو حاصل نہیں ہے تو ہم جیسے کمزور لوگو ں کے لیے اظہار سے بچنا ہی زیادہ بہتر ہے ۔لہٰذاکسی پر اپنی نیکیوں کا اظہار کرنے سے پہلے اپنے دل پر خوب غور کر لیجئے ۔کہیں ایسا نہ ہو کہ ہم شیطان کے جال میں پھنس کر ریاکاری کا وبال اپنے سر پر لے لیں۔
