Brailvi Books

    ریا کار کے لیے ایک بڑا نقصان وخَسارَہ یہ ہے کہ جب لوگو ں کو ان کے اَعمال کا ثواب ملے گااور ان پر اِنعامات کی بارش ہوگی تو رِیا کار کی تمام لوگو ں کے سامنے بے عزتی ہوگی۔ اس سے کہا جائے گا ، تو نے اپنے عمل کے ذریعے اﷲ عَزَّوَجَلَّ کی رضانہیں چاہی بلکہ تیرا مقصود یہ تھا کہ لوگ تیری تعریف کریں تو تُو ان کے پاس جااور ان ہی سے اپنا اِنعام وصول کر اور وہ لوگ کیونکر کچھ دے سکیں گے کیونکہ وہ تو خود ایک ایک نیکی کے محتاج ہو ں گے ۔چنانچہ حضرت سیدنا ابو سعید رضی اللہ تعالیٰ عنہ کہتے ہیں کہ میں نے اللہ کے حبیب صلی اللہ تعالی علیہ واٰلہ وسلم کو فرماتے ہوئے سنا : ''جب اللہ عَزَّوَجَلَّ تمام اگلوں اور پچھلوں کوقیامت کے دن جمع فرمائے گا تو ایک مُنادِی یہ نداء کریگا کہ جس نے کسی عمل میں کسی کو شریک کیا (یعنی ریا کاری کی) تو اسے چاہیے کہ وہ اپنا ثواب اس ہی سے لے کیونکہ اﷲعَزَّوَجَلَّ شرک سے بے پرواہ ہے۔''