Brailvi Books

    جو لوگ مال خرچ کرتے ہیں اپنے مال خدا کی راہ میں پھر اپنے دئیے کے پیچھے نہ احسان رکھیں، نہ دل دکھانا ،اُن کے لئے ان کا ثواب ہے اپنے رب کے پاس ، نہ اُن پر خوف اورنہ وہ غم کھائیں ، اچھی بات (کہ ہاتھ نہ پہنچا تو میٹھی زبان سے سائل کو پھیر دیا) اوردرگزرے (کہ فقیر نے نا حق ہٹ (۲) یا کوئی بے جا حرکت کی تو اس پر خیا ل نہ کیا، اسے دُکھ نہ دیا ) یہ اس خیرات سے بہتر ہے جس کے پیچھے دل ستانا (۳) ہو اوراللہ بے پرواہ ہے (کہ تمھارے صدقہ و خیرات کی پرواہ نہیں رکھتا ، احسان کس پر کرتے ہو)حلم والا ہے (کہ تمھیں بے شمار نعمتیں دے کر تمھاری سخت سخت نا فرمانیوں سے درگزر فرماتاہے تم ایک نوالہ محتاج کو دے کر و جہ بے و جہ اسے ایذا دیتے ہو) اے ایمان والو ! اپنی خیرات اکارت (۴) نہ کرو احسان رکھنے اوردل ستانے سے اس کی طرح جو مال خرچ کرتاہے لوگوں کے دکھاوے کو(کہ اس کا صدقہ سرے سے اکارت ہے و العیاذباللہ رب العالمین )

    ان سب باتوں کے لحاظ کے ساتھ اس عمل کو ایک ہی بار نہ کریں بار باربجالائیں(۵) کہ جتنی کثرت ہوگی اتنی ہی فقراء وغربا کی منفعت (۶) ہوگی، اتنی اپنے لئے دینی و دُنیوی و جسمی و جانی رحمت وبرکت ونعمت وسعادت ہوگی ،خصوصاً ا یام ِ قحط میں