Brailvi Books

	 15 محرم الحرام  کاوقت  دیتے ہوئے آپ کے دِل میں نیت یہی تھی کہ مجھے اس تاریخ میں کپڑا سی کر دے دینا ہے تب تو آپ اپنی جگہ صحیح ہیں اور بات بھی دُرُست ہے ۔ اب کسی وجہ سے 15تاریخ سے تاخیر ہوجائے تو آپ پر کوئی گناہ نہیں اوراگرآپ نے 15 محرم الحرام کی تاریخ دے کر جیسے تیسے کام تو لے لیامگراس مُقَرَّرہ تاریخ پر کام حوالے کرنے  کی نیت نہ تھی  بلکہ اس کو ٹَرخانے  اور دھکے  کھلانے کی نیت تھی تو آپ فسادِ نیت کی وجہ سے گنہگارہوں گے  ۔ 
میٹھے میٹھے اسلامی بھائیو!یہ بات  ذہن میں رکھ کرکسی کو وقت دیں گے تو اِنْ شَآءَاللہ عَزَّ  وَجَلَّ گناہ سے بچت رہے گی ۔ رہی بات حالات کے خراب ہونے کی توحالات ہر روز خراب نہیں ہوتے  ۔ اگر آپ کے علاقے میں حالات خراب تھے تو گاہک کو پتا ہوگا کہ اتنے دن سے حالات خراب ہیں ، دُکان بند پڑی ہے ، روز ہڑتالیں ہورہی ہیں تو ایسی صورتِ حال میں گاہک کوسمجھانا اِتنا دُشوار نہیں ہوتا بشرطیکہ سمجھانا بھی آتا ہو اوراگرسمجھانا نہیں آتا اور اَبے  تبے کر کے بات کی تو آپ سو فیصدی  سچے بھی ہوں گے تب بھی وہ آپ کی بات پریقین نہیں کرے گا اور یہی خیال کرے گا کہ آپ خواہ مخواہ ٹالم ٹول کر رہے ہیں  لہٰذا اپناکردار اور گفتار کو  ستھرا رکھیے اِنْ شَآءَ اللہ عَزَّوَجَلَّ گاہک مان جائے گا ۔  
اَخلاق ہوں اچھے مِرا کردار ہو ستھرا
                     محبوب کا صَدقہ تو مجھے نیک بنا دے 	 (وسائلِ بخشش)