Brailvi Books

     صحابہ کرام علیہم الرضوان کی اکثریت ایسی تھی جنہوں نے سرکار مدینہ   سے علمِ دین حاصل کیا پھراسے ساری دنیا میں پھیلانے کے لئے راہِ خدا عزوجل میں سفر اختیار کیا۔شاید یہی وجہ ہے کہ صحابہ کرام رضی اللہ عنہم کے مزارات صرف مدینہ طیبہ ہی میں نہیں بلکہ دنیا کے متعدد مقامات پر بھی موجود ہیں۔ ان کے بعد تابعین ، تبع تابعین ، ائمہ عظام اور اولیائے کرام نے نیکی کی دعوت کو عام کرنے کے اس سلسلے کوجس آب وتاب کے ساتھ قائم رکھا، وہ واقفانِ تاریخ سے مخفی نہیں ۔ اسی طرح حضور سیدی غوثِ اعظم شیخ عبدالقادر جیلانی رضی اللہ عنہ کے دامن ِ اقدس سے جو پاکباز لوگ وابستہ ہوئے انہوں نے دین ِ اسلام کے لئے بھر پور کوششیں کیں اوراعلی حضرت ،عظیم المرتبت ، الشاہ مولانا احمد رضا خان علیہ رحمۃ الرحمن اور آپ کے مریدین ومتوسلین نے بھی اس کام کا بیڑا اٹھایا اور اسلام کے پیغام کو دنیا میں عام کرنے کے لئے بھر پور جدوجہد کی ۔