۱؎ بکا بغیر ہمزہ کے بمعنی آنسو ہوتا ہے اور بکاء ہمزہ کے ساتھ بمعنی رونا۔ابکاء باب افعال سے بمعنی کسی دوسرے کو رلانا۔رونا بہت قسم کا ہے:غم سے رونا،بہت خوشی سے رونا ہے،عشق رسول یا عشق الٰہی میں رونا،ڈر سے رونا یہاں آخری رونا مراد ہے یعنی اللہ تعالٰی کے عذاب کے خوف سے رونا اسی لیے رونے کے ساتھ ڈر کا ذکر فرمایا۔اپنے حال زار پر رونا بھی اسی آخری رونے میں داخل ہے یہ رونا اللہ کی بڑی رحمت ہے۔مولانا فرماتے ہیں ؎
از پس ہرگریہ آخر خندہ ایست مرد آخر میں مبارک بندہ زیست
باش چوں دولاب دائم چشم تر تادروں صحن تو روید خضر
تانہ گرید طفل کے جوشدلبن تانہ گرید ابر کے خندو چمن
اﷲ تعالٰی تڑپنے پھڑکنے اپنے خوف سے رونے کی توفیق دے۔بادل روتاہے تو چمن ہنستا ہے،بچہ روتا ہے تو ماں کے پستان میں دودھ جوش مارتا ہے،ہمیشہ آنکھوں کے پانی سے ایمان کے کھیت کو سینچو تاکہ یہ باغ ہرا بھرا رہے۔
