روایت ہے حضرت عبداﷲ ابن مسعود سے فرماتے ہیں ہم کو رسول اﷲ صلی اللہ علیہ وسلم نے نماز میں اور حاجات میں تشہد سکھایا ۱؎ فرمایا نماز میں تشہد یہ ہے کہ تمام تحیتیں اور نمازیں، خوبیاں اﷲ کو ہیں سلام ہو آپ پر اے نبی ۲؎ اور اﷲ کی رحمت اور اس کی برکتیں سلام ہو ہم پر اور اﷲ کے تمام نیک بندوں پر ۳؎ میں گواہی دیتا ہوں یہ کہ نہیں ہے کوئی معبود سوا اﷲ کے اور گواہی دیتاہوں کہ بے شک محمد اﷲ کے بندے اوراس کے رسول ہیں۔اور خطبہ حاجت میں یہ ہے کہ تمام حمد اﷲ کو ہے ۴؎ہم اس سے مدد مانگتے ہیں ۵؎ اور اس سے معافی مانگتے ہیں ۶؎ ا ور اپنے نفسوں کی شرارتوں سے اﷲ کی پناہ لیتے ہیں ۷؎ جسے اﷲ ہدایت دے اسے کوئی گمراہ کرنے والا نہیں اور جسے اﷲ گمراہ کرے اسے ہدایت دینے والا کوئی نہیں ۸؎ اور گواہی دیتا ہوں کہ اﷲ کے سوا کوئی معبود نہیں اور گواہی دیتا ہوں کہ محمد اس کے بندے اور رسول ہیں ۹؎ اور تین آیتیں پڑھے ۱۰؎ اے ایمان والوں اﷲ سے ڈرو اس سے ڈرنے کا حق۱۱؎ اور ہر گز نہ مرو مگر اس حال میں کہ تم مسلمان ہو ۱۲؎ اے ایمان والو ۱۳؎ اس سے ڈور جس کے نام پر ایک دوسرے سے مانگتے ہو ۱۴؎ اور رحمی رشتوں سے ڈرو۱۵؎ بے شک اﷲ تم پر حافظ ہے اے ایمان والو ! اﷲ سے ڈرو اور درست بات کہو ۱۶؎ رب تمہارے کام درست کردے گا اور تمہارے گناہ بخش دے گا اور جو اﷲ رسول کی اطاعت کرے وہ بڑا ہی کامیاب ہے ۱۷؎(احمد،ترمذی،ابوداؤد،نسائی، ابن ماجہ،دارمی) اور جامع ترمذی میں ہے تینوں آیتوں کی تفسیر ۱۸؎ سفیان ثوری نے فرمائی اور ابن ماجہ نے الحمدﷲ کے بعد نحمدہ پڑھا۔اور من شرور انفسنا کے بعد ومن سیئات اعمالنا زیادہ کیا اور دارمی نے عظیما کے بعد فرمایا ۱۹؎ کہ پھر اپنے کام کی بات کرے اور شرح سنہ میں حضرت ابن مسعود سے خطبۃ الحاجۃ میں فرمایا نکاح وغیرہ ۲۰؎
