Brailvi Books

۱؎  آپ کا نام عبدالرحمن ابن قاسم ابن ابی لیلی یسار انصاری ہے،تابعی ہیں،ایک سو بیس صحابہ سے ملاقات ہے، جب حضرت عمر کی حیات شریف کے چھ سال باقی تھے آپ پیدا ہوئے،   ۸۲ھ؁ میں وفات پائی،آپ کے بیٹے محمد ابن عبدالرحمن کو بھی اسی نام ابن لیلی سے یاد کیا جاتا ہے جو کوفہ کے فقیہ قاضی تھے مگر جب ابن ابی لیلی مطلقًا بولا جاتا ہے تو آپ یعنی عبدالرحمن ہی مراد ہوتے ہیں۔

۲؎  چونکہ حضرات صحابہ تمام ہی عادل ہیں کوئی فاسق نہیں اس لیے ان کے نام معلوم نہ ہونا حدیث کی صحت کے لیے مضر نہیں یعنی ہم کو بہت صحابہ کرام نے یہ خبر دی ہے۔

۳؎ مشکوۃ شریف کےبعض نسخوں میں یسرون ہے سریٰ بمعنی رات میں چلنا،رب تعالٰی فرماتاہے:"سُبْحٰنَ الَّذِیۡۤ اَسْرٰی بِعَبْدِہٖ"عام نسخوں میں یسیرون ہے سیر سے مشتق بمعنی چلنا اور جانا،رب تعالٰی فرماتاہے:" قُلْ سِیۡرُوۡا فِی الۡاَرْضِ"غالب یہ ہے کہ یہ سفر کسی جہاد کے لیے تھا۔

۴؎ یعنی اس سونے والے کے پاس رہی تھی یا اس جانے والے کے پاس تھی اس نے یہ رسی سانپ کی طرح اس پر ڈالی وہ سونے والے اسے سانپ سمجھ کر ڈر گئے اور لوگ ہنس پڑے۔

۵؎ جب رسول اﷲ صلی اللہ علیہ و سلم نے یہ سنا تو یہ فرمایا۔اس فرمان عالی کا مقصد یہ ہے کہ ہنسی مذاق میں کسی کو ڈرانا جائز نہیں کہ کبھی اس سے ڈرنے والا مرجاتا ہے یا بیمار پڑ جاتا ہے،خوش طبعی وہ چاہیے جس سے سب کا دل خوش ہوجائے کسی کو تکلیف نہ پہنچے۔اس حدیث سے معلوم ہوا کہ ایسی دل لگی ہنسی کسی سے کرنی جس سے اس کو تکلیف پہنچے مثلًا کسی کو بے وقوف بنانا اس کے چپت لگانا وغیرہ حرام ہے۔