Brailvi Books

۱؎ یعنی بدنی و مالی عبادات سے افضل ہوں۔

 ۲؎ اگر یہاں ذکر اﷲ سے مراد زبانی ذکر ہے تو اس کی افضیلت کی وجہ یہ ہے کہ ذکر اﷲ بلاواسطہ رب تعالٰی تک پہنچاتا ہے اور دوسری عبادتیں بالواسطہ اور ظاہر ہے کہ بلاواسطہ پہنچانے والا بالواسطہ سے افضل ہے۔اور اگر ذکر سے مراد قلبی و دلی ذکر اﷲ ہے تو ظاہر ہے کہ یہ ذکر دلی عبادت ہے اور دوسری عبادات بدنی عبادت اور دل بادشاہ ہے۔اعضاء اس کی رعایا بادشاہ کا عمل بھی رعایا کے اعمال سے افضل ہے،اسی لیے رب تعالٰی نے قرآن کریم میں ذکر اﷲ کے بڑے درجے بیان فرمائے کہ فرمایا"فَاذْکُرُوۡنِیۡۤ اَذْکُرْکُمْ"تم مجھے یاد کرو میں تمہیں یاد کرو ں گا حدیث قدسی ہے "انا جلیس من ذکرنی"میں اپنے ذاکر کا ہم نشین ہوں۔ اس سے معلوم ہواکہ بعض آسان عمل مشکل عملوں سے درجہ  میں بھی بڑھ جاتے ہیں دیکھو ذکر اﷲ آسان ہے اور جہاد دشوار مگر ثواب میں ذکر اﷲ بڑھ گیا مگر یہ اس جہاد کا ذکر ہے جو اﷲ کی یاد سے خالی ہو،لیکن اگر ہاتھ میں تلوار اور زبان پر ذکر یار ہو تو سبحان اﷲ سب سے بہتر۔ شیخ نے فرمایا کہ بعض لازم عمل متعدی عمل سے بہتر ہوجاتے ہیں جیسا یہاں ہوا ۔صوفیاء فرماتے ہیں کہ جہاد میں کافروں کو مارا جاتا ہے اور ذکر اﷲ میں نفس و شیطان کو اسی لیے ذکر اﷲ جہاد اکبر ہے کہ اس میں دل کا تزکیہ ہے پھر ذکروں میں بعض ذکر دوسرے ذکروں سے افضل ہیں جیسے تلاوت قرآن شریف و درود شریف دوسرے اذکار سے بہتر ہیں۔

 ۳؎ یعنی مؤطا امام مالک میں تو یہ حدیث موقوف ہے اور باقی محدثین کے ہاں مرفو ع اسے حاکم نے بھی مستدرک میں مرفوعًا ہی نقل فرمایا۔