Brailvi Books
 |
لباب الاحیاء (احیاء العلوم کا خلاصہ) |
92 - 415
حضرت سیِّدُنا عمر فاروق رضی اللہ تعالیٰ عنہ اس خوف سے حجّاج کرام کو حج کرنے کے بعد واپس بھیج دیتے، کہ لوگوں کو اس سے اُکتاہٹ پیدا نہ ہوجائے اور فرماتے اے اہل یمن! یمن کو جاؤ ،اے شام والو! شام کی طرف جاؤ، اے اہل عراق! عراق کی طرف جاؤ۔اسی طرح کہا گیاہے کہ وہاں سے جدا ہونے کی وجہ سے دوبارہ آنے کا شوق پیدا ہوتا ہے۔اللہ عَزَّوَجَلَّ کا فرمان ہے:
وَ اِذْ جَعَلْنَا الْبَیۡتَ مَثَابَۃً لِّلنَّاسِ وَاَمْنًا ؕ
ترجمۂ کنزالایمان:اور(یادکرو)جب ہم نے اس گھر کو لوگوں کے لئے مرجع اور امان بنایا۔(پ1، البقرہ: 125)
ایک قول یہ ہے کہ اس خوف سے(وہاں ٹھہرنا ناپسندیدہ ہے)کہ کہیں گناہ اور خطاؤں کا ارتکاب نہ ہو جائے اوریہ ممنوع ہے ۔ جو مکہ کے حقوق پورے کر سکے اس کے لئے وہاں ٹھہرنے کی فضیلت کے لئے یہی بات کافی ہے کہ جب نبی اکرم صلَّی اللہ تعالیٰ علیہ وآلہ وسلَّم دوبارہ مکہ تشریف لائے تو کعبۃ اللہ کی طرف متوجہ ہو کر فرمایا:''بلاشبہ تو اللہ عَزَّوَجَلَّ کی بہترین زمین ہے اور مجھے اللہ عَزَّوَجَلَّ کے تمام شہروں سے زیادہ محبوب ہے اور اگر مجھے یہاں سے جانے پر مجبور نہ کیا جاتا تو میں یہاں سے نہ جاتا۔''(سنن ابن ماجۃ ،ابواب المناسک ،باب فضل مکۃ ،الحدیث۳۱۰۸،ص۲۶۶۵)