Brailvi Books
 |
لباب الاحیاء (احیاء العلوم کا خلاصہ) |
56 - 415
اور کلائی تک لے آئے بائیں ہاتھ کے انگوٹھے کے اندروالے حصے کو دائیں ہاتھ کے انگوٹھے کے ظاہر پر پھیرے پھر بائیں بازو کے ساتھ بھی اسی طرح کرے پھر ہتھیلیوں کا مسح کر کے انگلیوں کے درمیان خلال کرے اس تکلیف کا مقصد یہ ہے کہ ایک ہی ضرب کے ساتھ کہنیوں تک گھیرنا پایا جائے لیکن اگر ایک ضرب سے ایسا کرنا مشکل ہو تو دو یا زیادہ ضربوں سے گھیرنے میں حرج نہیں۔اور ایک تیمم کے ساتھ ایک فرض نمازاور جتنے چاہے نوافل پڑھ سکتے ہیں ۔ ۱؎
صفائی نصف ایمان ہے:
سر، کان اور ناک کے میل کو صاف کرنا مستحب ہے نیز انگلیوں کے کناروں اور ناخنوں کے نیچے جمع ہونے والی میل کچیل کی صفائی کرنا بھی مستحب ہے۔
ناخن کاٹنے، بغل کے بال اکھیڑنے اور موئے زیر ناف صاف کرنے میں چالیس دن سے زیادہ تاخیر کرنا مکروہ ہے اور حمام میں اس شرط پر داخل ہو سکتا ہے کہ وہ اپنا ستر چھپائے اور دوسروں کا ستر دیکھنے سے بچے اور داخل ہوتے وقت نماز کے لئے طہارت کی نیت کرے اورحمام میں داخل ہوتے وقت وہی دعا پڑھے جو بیت الخلاء میں داخل ہوتے وقت پڑھی جاتی ہے اوراسی طرح باہر نکلتے وقت کی دعا پڑھے۔جب ناخن کاٹنے کا ارادہ کرے تو دائیں ہاتھ کی چھوٹی انگلی سے شروع کرکے انگوٹھے پر ختم کرے اور سرمہ طاق عدد میں لگاناچاہے۔ مروی ہے کہ نبئ اَکرم صلَّی اللہ تعالیٰ علیہ وآلہ وسلَّم دائیں آنکھ میں تین اور بائیں آنکھ میں دو سلائیاں پھیرتے تاکہ ان کا مجموعہ طاق ہو ۔''(العجم الکبیر ،الحدیث۱۳۳۵۳،ج۱۲،ص۲۷۹،مختصرًا)