Brailvi Books

لباب الاحیاء (احیاء العلوم کا خلاصہ)

42 - 415

نہیں نکل سکتا وہ جس چیز کو چاہتا ہے ہوجاتی ہے اور جسے نہیں چاہتا وہ نہیں ہوتی۔ وہی ابتداء ًپیداکرنے والا اور دوبارہ (یعنی قرب قیامت میں ) لوٹانے والا ہے۔جو چاہتا ہے کر تا ہے اس کے حکم کو کوئی ٹال نہیں سکتا۔ اس کے فیصلے کو کوئی پیچھے نہیں کر سکتا ۔بندے کے لئے اس کی توفیق و رحمت کے بغیر اس کی نافرمانی سے بچنا ممکن نہیں ۔اس کی اطاعت کی قوت بھی اسی کی محبت وارادہ سے حاصل ہوتی ہے اگر تمام انسان، جن، فرشتے اور شیطان دنیا میں کسی ذرہ کو حرکت دینے پر اتفاق کر لیں یا اسے ٹھہرا دیں تو اللہ عَزَّوَجَلَّ کے ارادہ ومشیَّت کے بغیر وہ اس سے عاجز رہ جائیں گے اس کاا رادہ دیگر صفات کے ساتھ اس کی ذات میں قائم ہے۔ وہ ہمیشہ سے اس سے موصوف ہے۔ اس نے اَزَل میں اشیاء کے وجو د کا ان کے اوقات پر ظہور کاا رادہ فرمایا چنانچہ ہر چیز اس کے ازلی ارادہ کے مطابق بغیر کسی تقدیم و تاخیر کے اپنے وقت پر ظاہرہوئی۔ اس نے امور کی تدبیرسوچ بچار اور وقت کی تاخیرکے بغیر فرمائی اس لئے اسے کوئی ایک کام دوسرے کام سے غافل نہیں کرتا۔

اللہ عَزَّوَجَلَّ کی سماعت وبصارت:

    اللہ عَزَّوَجَلَّ سمیع و بصیر ہے ۔وہ سنتا اور دیکھتا ہے۔ اس کی سماعت سے کوئی سنی جانے والے چیز اگرچہ وہ پو شیدہ ہو باہر نہیں اور باریک سے باریک چیز بھی اس کی بصارت سے غائب نہیں۔ اس کی سماعت میں دوری اور اندھیرا رکاوٹ نہیں، وہ آنکھوں کی پتلیوں اور پلکوں کے بغیر دیکھتا ہے اور کانوں اور ان کے سوراخ کے بغیر سنتا ہے جیسے وہ دل کے بغیر جانتا ،کسی عضوکے بغیر پکڑتا اور کسی آلہ کے بغیر پیدا کرتا ہے کیونکہ اس کی صفات مخلوق کی صفات جیسی نہیں جیسے اس کی ذات مخلوق کی ذات کی طرح نہیں۔