Brailvi Books

ترجمہ :اے اللہ کے رسول عَزَّوَجَلَّ و صلَّی اللہ تعالیٰ علیہ وآلہ وسلَّم!آپ پر سلامتی ہو۔ یہ میرا زمین پر اُترنا آخری بارہے، وحی بھی لپیٹ دی گئی اور زمین بھی اور زمین پر مجھے آپ صلَّی اللہ تعالیٰ علیہ وآلہ وسلَّم کے سوا کوئی کام نہ تھا، میری غرض صرف آپ صلَّی اللہ تعالیٰ علیہ وآلہ وسلَّم کی بارگاہ میں حاضری تھی، اب میں اپنی جگہ پررہوں گا۔'' (ام المؤمنین حضرت سَیِّدَتُنا عائشہ رضی اللہ تعالیٰ عنہا فرماتی ہیں) اس ذات کی قسم جس نے آپ صلَّی اللہ تعالیٰ علیہ وآلہ وسلَّم کو حق کے ساتھ مبعوث فرمایا! گھرمیں کسی کو بولنے کی تا ب نہ تھی، اورباہر سے مردوں کو بھی کوئی نہ بلاتا تھا، اس کی وجہ یہ تھی کہ حضرت جبرائیل علیہ السلام کا کلام اس بڑے درجے کا تھا،ہم سب سہمے ہوئے اور خوفزدہ تھے۔ اُمُّ المو منین فرماتی ہیں: پھر میں اُٹھ کرآپ صلَّی اللہ تعالیٰ علیہ وآلہ وسلَّم کی خدمت میں حاضرہوئی اور آپ صلَّی اللہ تعالیٰ علیہ وآلہ وسلَّم کا سرِانوراپنی چھاتی کے ساتھ لگا یا اور آپ صلَّی اللہ تعالیٰ علیہ وآلہ وسلَّم کے سینۂ مبارک کو تھام لیا، آپ صلَّی اللہ تعالیٰ علیہ وآلہ وسلَّم پر بےہوشی طاری ہوگئی حتی کہ غا لب آگئی۔ آپ صلَّی اللہ تعالیٰ علیہ وآلہ وسلَّم کی پیشانی سے اس قدرپسینہ ٹپکتا تھا کہ میں نے کبھی کسی انسا ن کو آپ صلَّی اللہ تعالیٰ علیہ وآلہ وسلَّم سے زیادہ خوشبودار نہیں دیکھا، میں وہ پسینہ پونچھتی تھی اوراس سے زیادہ خوشبودارچیزنہیں دیکھی۔ جب آپ کو افاقہ ہوتاتومیں عرض کرتی: ''میرے ماں باپ، میری جان ، گھر والے،مال واسباب سب آپ پرقربان ہوں، آپ صلَّی اللہ تعالیٰ علیہ وآلہ وسلَّم کی پیشانی پراس قدرپسینہ کیوں ہے ؟ آپ صلَّی اللہ تعالیٰ علیہ وآلہ وسلَّم نے ارشاد فرمایا: ''اے عا ئشہ ! مؤمن کی جان پسینے کے ذریعے نکلتی ہے اور کافرکی جان گدھے کی جان کی طرح اس کے نتھنوں سے نکلتی ہے۔'' اس وقت ہم سب عورتیں ڈرگئیں اور اپنے گھر کسی کو بھیجا، سب سے پہلے میرے بھائی تشریف لائے لیکن وہ آپ سے ملاقات نہ کرسکے۔ انہیں میرے والد ِماجدنے میرے پاس بھیجا تھا، او رکسی کے آنے سے پہلے ہی آپ صلَّی اللہ تعالیٰ علیہ وآلہ وسلَّم نے اپنی جان جانِ آفریں کے سپردکردی اور اللہ عَزَّوَجَلَّ نے سب کو روک رکھا تھا کیونکہ اللہ عَزَّوَجَلَّ نے آپ کا معاملہ حضرت جبرائیل اور حضرت میکائیل علیھما السلام کے سپرد کررکھاتھا اورجب آپ پربیہوشی طاری ہوئی تو آپ صلَّی اللہ تعالیٰ علیہ وآلہ وسلَّم نے فرمایا: '' بَلِ الرَّفِیْقُ الْأعْلٰی ترجمہ: رفیقِ اعلیٰ کے پاس جانا ہے۔''