Brailvi Books
 |
لباب الاحیاء (احیاء العلوم کا خلاصہ) |
بن جائے گا،پس وہ اللہ عَزَّوَجَلَّ کے بندو ں میں داخل ہو جائے گا وہ اس طرح کہ وہ اللہ عَزَّوَجَلَّ سے راضی اور اللہ عَزَّوَجَلَّ اس سے راضی ہوگا، لہٰذا تم نفس سے ایک لمحہ کے لئے بھی غا فل نہ رہو اور جب تک اس کی اصلاح نہ کرلو دو سرے کو نصیحت نہ کرو۔ اللہ عَزَّوَجَلَّ نے حضرت سَیِّدُنا عیسیٰ علی نبیناوعلیہ الصلوٰۃوالسلام سے اِرشاد فرمایا: ''اے ابن مریم ! اپنے نفس کو نصیحت کرو، اگر اس نے نصیحت مان لی، تو لوگو ں کو نصیحت کرنا ورنہ مجھ سے حیاء کرنا۔''
اللہ عَزَّوَجَلَّ کافرمانِ عالیشان ہے:وَّ ذَکِّرْ فَاِنَّ الذِّکْرٰی تَنۡفَعُ الْمُؤْمِنِیۡنَ ﴿55﴾
ترجمۂ کنزالایمان : اور سمجھاؤ کہ سمجھانا مسلمانوں کو فائدہ دیتا ہے۔(پ 27 ، الذٰریٰت:55)
پس تم پرلازم ہے کہ اپنے نفس پر تو جہ دو او راسے بار بار اس کی حماقت، جہالت اور دھوکا دہی بتاؤ اور اُسے کہو: تجھے شرم نہیں آتی کہ تُو لوگو ں کو احمق وجاہل بتاتا ہے ،حالانکہ توخود سب سے بڑا جاہل ہے،بے شک تو جنت یا دوزخ کی طرف جائے گا اور تجھے کیا ہے کہ تو لہوولعب اور ہنسنے میں مشغول ہے، حالانکہ تو ہر اس کام کے لئے مطلوب ہے، شاید تو موت کو دور سمجھتا ہے حالانکہ وہ قریب ہے، شاید موت آج دن، را ت یا کل آجائے اور مستقبل میں واقع ہونے والی ہر چیز قریب ہی ہوتی ہے، کیا تجھے معلوم نہیں کہ وہ اچانک آئے گی اور اس سے پہلے کو ئی قاصِد نہیں آئے گا۔