Brailvi Books

    حضرت سَیِّدُنا عیسیٰ علٰی نبیناوعلیہ الصلوٰۃو السلام سے پوچھا گیا : ''آپ اپنی سواری کے لئے دراز گو ش(یعنی گدھا) کیوں نہیں خرید لیتے؟''توآپ علیہ السلام نے فرمایا:''مجھ پر یہ بات شاق گزرے گی، کہ اللہ عَزَّوَجَلَّ میری توجہ اپنی ذات سے ہٹا کر درازگوش میں مشغول کردے۔''حدیث ِ پاک میں ہے:

إذَا أحَبَّ اللہُ عَبْدًا إبْتَلَاہ،، فَإنْ صَبَرَ إجْتَبَاہ،، وَإنْ رَضِیَ إصْطَفَاہ،۔

ترجمہ:جب اللہ عَزَّوَجَل کسی بندے سے محبت کرتا ہے تو اس کو آزمائش میں ڈالتا ہے پس اگر وہ صبر کرے تو اللہ عَزَّوَجَلَّ اسے چن لیتا ہے اور راضی ہو تو اسے منتخب فرمالیتا ہے۔

(فردوس الاخبار للدیلمی، باب الالف، الحدیث۹۷۶،ج۱،ص۱۵۱)

    علماء کرام فرماتے ہیں: ''بندے کی اللہ عَزَّوَجَلَّ سے محبت کی علامت یہ ہے کہ اللہ عَزَّوَجَلَّ جس سے محبت کرتا ہے بندہ اسے اپنی محبوب ترین چیزپرترجیح دیتا ہے اوربکثرت اس کا ذکر کرتا ہے، اس میں کوتا ہی نہیں کرتا اور کسی دو سرے کام میں مشغول ہونے کے بجائے بندے کو تنہائی اور اللہ عَزَّوَجَلَّ سے مناجات کرنا زیادہ محبوب ہوتا ہے۔''

فضیلتِ رضا کابیان:

    اللہ عَزَّوَجَلَّ کا فرمانِ عالیشان ہے:

رَضِیَ اللہُ عَنْہُمْ وَ رَضُوۡا عَنْہُ ؕ

ترجمۂ کنزالایمان: اللہ اُن سے راضی اور و اللہ سے راضی۔(پ7 ، المآئدۃ: 119)