Brailvi Books
 |
لباب الاحیاء (احیاء العلوم کا خلاصہ) |
326 - 415
ایک روایت میں ہے، حضرت سَیِّدُناجبرائیل علیہ السلام نبئ اَکرم صلَّی اللہ تعالیٰ علیہ وآلہ وسلَّم کی بارگاہ بے کس پناہ میں حاضر ہوئے اور عرض کی:'' اللہ عَزَّوَجَلَّ آپ کو سلام بھیجتا ہے اور استفسار فرماتا ہے:'' کیا آپ کو یہ بات پسند ہے کہ میں ان پہاڑوں کو آپ کے لئے سونا بنادو ں اور آپ جہاں بھی ہوں یہ آپ کے ساتھ رہیں؟'' نبئ اَکرم صلَّی اللہ تعالیٰ علیہ وآلہ وسلَّم نے کچھ دیر سرِ اقدس جھکائے رکھا پھر فرمایا :'' اے جبریل ! دنیا اس کا گھر ہے جس کا کوئی گھر نہ ہو، اس کا مال ہے جس کا کوئی مال نہ ہو اور اسے وہی جمع کرتا ہے جو عقلمند نہ ہو۔'' توجبریل علیہ السلام نے عرض کی: ''اے محمد صلَّی اللہ تعالیٰ علیہ وآلہ وسلَّم! اللہ عَزَّوَجَلَّ آپ کو قول ثابت پر قائم رکھے۔''
(المسند للامام احمد بن حنبل، مسند السیدۃ عائشۃ، الحدیث۲۴۴۷۳،ج۹،ص۳۴۳۔۳۴۴) (مصنف ابن ابی شیبۃ، کتاب الزھد، باب ما قالوا فی البکاء من خشیۃ اﷲ، الحدیث۱۸۶،ج۸،ص۳۲۱)
مروی ہے کہ حضرت سَیِّدُنا عیسیٰ علیٰ نبیناوعلیہ الصلوٰۃو السلام اپنی سیاحت کے دوران ایک ایسے شخص کے پاس سے گزرے جو چادر میں لپٹے ہوئے سو رہا تھا، آپ علیہ السلام نے اسے جگایا اور فرمایا: ''اے سونے والے! اٹھ اور اللہ عَزَّوَجَلَّ کو یاد کر۔'' اس نے عرض کی: ''آپ علیہ السلام مجھ سے کیا چاہتے ہیں؟ میں نے دنیا کو دنیا والوں کے لئے چھوڑدیا ہے۔''آپ علیہ السلام نے اس سے فرمایا: ''اے میرے دو ست! اگر یہ بات ہے تو سو جاؤ۔''
اللہ کے مَحبوب، دانائے غُیوب، مُنَزَّہ ٌعَنِ الْعُیوب عَزَّوَجَلَّ و صلَّی اللہ تعالیٰ علیہ وآلہ وسلَّم نے ارشادفرمایا:''میں نے جنت میں جھانکا ،تو اس میں اکثر فقراء کو پایا اور جہنم میں جھانکا ،تو اس میں اکثر اُمراء کو پایا۔''(صحیح البخاری،کتاب الرقاق، باب فضل الفقر، الحدیث۶۴۴۹،ص۵۴۲، اغنیاء:بدلہ: النساء)