Brailvi Books

    (امام غزالی علیہ رحمۃ اللہ الوالی فرماتے ہیں کہ)یہ لوگ کفار ہیں ،کبھی ان کو ایمان اچانک حاصل ہوتا ہے ، کبھی دلیل و برہان کے ذریعے اور کبھی تقلید سے حاصل ہوتا ہے اور اس میں شک نہیں کہ مریض صحت کی امید رکھتے ہوئے حکیم کے کہنے پردَوا پیتا ہے لیکن اگر وہ کہے کہ میں اس وقت تک دوا نہیں پیؤں گا جب تک اس کے نفع بخش ہونے کا یقین نہ آجائے تو یہ اس کی ہلاکت کی دلیل ہے۔ حالانکہ عقل توبرے گمان اور محض احتمال سے بچنے کا تقاصا کرتی ہے اور اگر انبیاءِ کرام علیہم السلام کے فرامین اور معجزات اس غور وفکر کرنے والے کو یقین کا فائدہ نہ دیں توکم از کم اسے غالب گمان یا احتمال کا فائدہ بھی نہیں دیتے ،جبکہ عقلمند تو احتمالِ محض سے بھی بچتا ہے۔ اسی لئے امیر المؤمنین،مولیٰ مشکل کشاحضرت سیِّدُناعلی المرتضیٰ کَرَّمَ اللہُ تَعَالٰی وَجْہَہُ الْکَرِیْم نے کسی ملحد کو دلائل دینے کے بعد اِرشاد فرمایا:'' اگر تمہاراقول صحیح ہے تومیں نے بھی نجات پائی اور تم نے بھی اور اگر میراقول صحیح ہے تو میں نے نجات پائی اور تم ہلاک ہوئے۔''(امام غزالی علیہ رحمۃ اللہ الوالی احیاء علوم الدین میں یہ قول نقل کرنے کے بعدتحریر فرماتے ہیں کہ''آپ رضی اللہ تعالیٰ عنہ نے یہ بات اس لئے نہیں فرمائی کہ آپ رضی اللہ تعالیٰ عنہ کو آخرت پر یقین نہیں تھا بلکہ آپ رضی اللہ تعالیٰ عنہ نے اس سے اس کی عقل کے مطابق کلام کر کے اس پر واضح کر دیا کہ اگر تمہیں آخرت پر یقین نہیں تو تم دھوکے میں مبتلاء ہو۔'')

    کچھ لوگوں کو ان کے اس قول نے دھوکے میں ڈالا کہ بے شک اللہ عَزَّوَجَلَّ رحیم وکریم ہے اور بعض لوگ اپنے آباؤاجداد کے تقوی وپرہیزگاری سے وسیلہ پکڑتے ہیں اور یہ سب ناممکن ہے۔ جبکہ ان کا یہ قول صحیح ہے کہ بے شک اللہ عَزَّوَجَلَّ رحیم وکریم ہے لیکن تمام آیاتِ قرآنیہ اس بات پر دلالت کرتی ہیں کہ اس کارحم و کرم یہ ہے کہ اللہ عَزَّوَجَلَّ اُسے دنیا میں نیکیوں کی توفیق عطا فرماتا ہے، کیونکہ اللہ عَزَّوَجَلَّ خود اِرشاد فرماتا ہے: