Brailvi Books

    حضرت سیِّدُنا امام محمدبن ادریس شافعی علیہ رحمۃ اللہ الکافی کے عابد ہونے پردلیل یہ ہے کہ آپ نے رات کو تین حصوں میں تقسیم فرما رکھا تھا ایک تہائی علم کے ليے، دوسری تہائی عبادت کے ليے اور تیسری تہائی نیند کے لئے۔

    حضرت سیِّدُناربیع علیہ رحمۃ اللہ القوی فرماتے ہیں: ''حضرت سیِّدُنا امام شافعی علیہ رحمۃ اللہ الکافی رمضان المبارک میں نماز میں ساٹھ مرتبہ قرآن مجیدختم کیا کرتے تھے۔''

    آپ رحمۃ اللہ تعالیٰ علیہ کے ایک دو ست حضرت سیِّدُنا بُویطِی رحمۃ اللہ تعالیٰ علیہ فرماتے ہیں: ''حضرت سیِّدُنا امام شافعی علیہ رحمۃ اللہ الکافی روزانہ ایک بار قرآن پاک ختم فرماتے تھے۔''

    حضرت سیِّدُنا حسن کرابیسی رحمۃ اللہ تعالیٰ علیہ فرماتے ہیں:'' میں نے حضرت سیّدُنا امام شافعی علیہ رحمۃ اللہ الکافی کے ساتھ کئی راتیں گزاریں آپ تقریباََ رات کا ایک حصہ نماز پڑھتے اور میں نے دیکھا کہ آپ پچاس آیات سے زیادہ نہیں پڑھتے تھے اگر کبھی زیادہ پڑھتے تو سو آیات ہوجاتیں۔ آپ رحمۃ اللہ تعالیٰ علیہ جب کسی آیتِ رحمت پر پہنچتے تو اللہ عَزَّوَجَلَّ سے اپنے لئے اور تمام مؤمنین کے لئے رحمت کا سوال کرتے اور جب عذاب والی آیت پڑھتے تو عذاب سے پناہ مانگتے ۔اپنے لئے اور تمام مؤمنین کے لئے نجات کا سوال کرتے۔''

    آپ رحمۃاللہ تعالیٰ علیہ کا پچاس آیات پر اکتفاء کرنا اس بات پر دلالت کرتا ہے کہ آپ رحمۃاللہ تعالیٰ علیہ کوقرآن مجید کے اسرار و رموز میں تبحروکمال حاصل تھا۔