Brailvi Books

    حضورنبئ پاک، صاحب ِ لَولاک،سیَّاحِ افلاک صلَّی اللہ تعالیٰ علیہ وآلہ وسلَّم نے ارشاد فرمایا:

مَا الدُّنْیَا فِی الْاٰخِرَۃِ اِلَّا کَمَثَلِ مَا یَجْعَلُ اَحَدُکُمْ اَصْبَعَہ، فِیْ الْیَمِّ فَلْیَنْظُرْمَا یَرْجِعُ اِلَیْہِ۔

ترجمہ:آخرت کے مقابلے میں دنیا اسی طرح ہے جیسے تم میں سے کوئی اپنی انگلی کو سمندر میں ڈالتا ہے تو اسے دیکھنا چاہے کہ وہ کیا لے کر آتی ہے۔

(صحیح مسلم، کتاب الجنۃ، باب فناء الدنیا ۔۔۔۔۔۔الخ، الحدیث۷۱۹۷،ص۱۱۷۳)

دُنیا کی حقیقت وماہیت کا بیان:

    جان لو! بے شک دنیا و آخرت کوتیری دو حالتوں سے تعبیرکیا گیا ہے ،جو قریب ہے اس کا نام دنیا ہے اور یہ سب کچھ موت سے پہلے ہے اور جو دُور ہے اسے آخرت کہتے ہیں اور یہ سب موت کے بعد ہے اور دنیا میں علم وعمل ہی ایسی چیز ہے جو موت کے بعد تمہارا ساتھ دے گی، یہ(علم و عمل)آخر ت کے معاملات میں شمار کئے جاتے ہيں ،اگرچہ صوری اعتبار سے یہ اس عالم میں ہیں۔ جیسا کہ نبئ کریم، رء ُوف رحیم صلَّی اللہ تعالیٰ علیہ وآلہ وسلَّم نے ارشاد فرمایا:

حُبِّبَ إلَیَّ مِنْ دُنْیَاکُمْ ثَلَاثٌ:اَلطِّیْبُ وَالنِسَاءُ وَجُعِلَتْ قُرَّۃُعَیْنِیْ فِی الصَّلٰوۃِ۔

ترجمہ:مجھے تمہاری دنیا میں سے تین چیزیں محبوب ہیں: خوشبو ،عورتیں اور میری آنکھوں کی ٹھنڈک نماز بنائی گئی۔

 (سنن النسائی، کتاب عشرۃ النسآء، باب حب النسآء، الحدیث۳۳۹۱/۳۳۹۲،ص۲۳۰۷)

    پس آپ صلَّی اللہ تعالیٰ علیہ وآلہ وسلَّم نے نماز کو دنیا اور اس کی لذَّات میں شمار فرمایا کیونکہ نمازکی حرکات'' محسوسات و مشاہدات'' میں داخل ہیں۔