Brailvi Books

مَنْ دَعَا عَلٰی مَنْ ظَلَمَہ، فَقَدْاِنْتَصَرَ۔

ترجمہ:جس نے اپنے اوپرظلم کرنے والے کے خلاف بد دعا کی اس نے اپنا بدلہ لے لیا۔

(جامع الترمذی، کتاب الدعوات، باب من دعا علی من ظلمہ فقد انتصر، الحدیث۳۵۵۲،ص۲۰۱۷)

نرمی کی فضیلت کا بیان:

    جان لو! نرمی قابلِ تعریف ہے اور یہ اچھے اخلاق کا نتیجہ ہے، اس کی ضد سخت مزاجی اور گرمی ہے۔

    سیِّدُ المبلغین، رَحْمَۃٌ لِّلْعٰلَمِیْن صلَّی اللہ تعالیٰ علیہ وآلہ وسلَّم نے ام المؤمنین حضرت سیِّدُتُناعائشہ صدیقہ رضی اللہ تعالیٰ عنہا سے ارشاد فرمایا:''جس شخص کو نرمی سے حصہ ملا اسے دنیا و آخرت کی بھلائی سے حصہ ملا اور جوشخص نرمی سے محروم رہا وہ دنیاوآخرت کی بھلائی سے محروم رہا۔''

    (مسند ابی یعلی الموصلی، مسند عائشۃ، الحدیث۴۵۱۳،ج۴،ص۱۱۸۔۱۱۹)

    نبئ رحمت،شفیعِ اُمت،قاسمِ نعمت صلَّی اللہ تعالیٰ علیہ وآلہ وسلَّم کافرمانِ ذیشان ہے:

اِذَا اَحَبَّ اللہُ اَھْلَ بَیْتٍ اَدْخَلَ عَلَیْھِمُ الرِّفْقَ۔

ترجمہ:اللہ عَزَّوَجَلَّ جب کسی گھرانے کو پسند فرماتا ہے تو ان میں نرمی پیدا کردیتا ہے۔

(المسند للامام احمد بن حنبل،مسند السیدۃ عائشۃ، الحدیث۲۴۴۸۱،ج۹،ص۳۴۵، اِذا أحب: بدلہ: اِذا اَراد)