Brailvi Books
 |
لباب الاحیاء (احیاء العلوم کا خلاصہ) |
251 - 415
انسان کو چاہے کہ غصے کے وقت یہ (مندرجہ بالا)الفاظ کہے، کھڑا ہو تو بیٹھ جائے اوربیٹھا ہو تو لیٹ جائے۔چنانچہ اللہ کے مَحبوب، دانائے غُیوب، مُنَزَّہ ٌعَنِ الْعُیوب عَزَّوَجَلَّ و صلَّی اللہ تعالیٰ علیہ وآلہ وسلَّم کافرمانِ عالیشان ہے:''بے شک غصہ ایک چنگاری ہے جو دل میں بھڑکتی ہے، کیا تم اس کی وجہ سے رگوں کے پھولنے اور آنکھوں کی سرخی کو نہیں دیکھتے پس جب تم میں سے کوئی ایسی بات(یعنی غصہ) پائے تو اگرکھڑا ہو تو بیٹھ جائے اور بیٹھا ہو تو لیٹ جائے اگر اس طرح بھی غصہ ختم نہ ہو تو ٹھنڈے پانی سے وضو یا غسل کرے کیونکہ پانی ہی آگ کو بجھاتا ہے۔''
(جامع الترمذی، ابواب الفتن، باب ماأخبرالنبی أصحابہ بماہوکائن الی یوم القیامۃ، الحدیث۲۱۹۱،ص۷۲ ۸ ۱۔سنن ابی داؤد،کتاب الادب،باب مایقال عندالغضب، الحدیث۴۷۸۲/۴۷۸۴، ص۱۵۷۵)
فضیلتِ حِلم کا بیان:۱؎
جان لیجئے! حلم(یعنی طبعی بردباری) غصہ پی جانے سے افضل ہے کیونکہ غصہ پینے سے مراد تکلفاً برداشت کرنااورتکلفاً برُدبار بننا ہے جبکہ طبعی برُدباری عقل کے کامل ہونے کی دلیل ہے اور قوتِ غضب کا ٹوٹنا عقل کے ماتحت ہے اور اس کی ابتداء تکلفاً برُدبار بننے سے ہوتی ہے پھریہ عادت بن جاتی ہے۔جیسا کہ حسنِ اَخلاق کے پیکر،نبیوں کے تاجور، مَحبوبِ رَبِّ اَکبرعَزَّوَجَلَّ و صلَّی اللہ تعالیٰ علیہ وآلہ وسلَّم کافرمانِ ذیشان ہے:'' علم سیکھنے سے حاصل ہوتا ہے اور بردباری تکلفاًبرداشت کرنے سے پیداہوتی ہے۔ جو شخص بھلائی حاصل کرنے کی کوشش کرتا ہے اسے بھلائی دی جاتی ہے اور جو شر سے بچنا چاہتا ہے اسے بچالیا جاتا ہے۔''