Brailvi Books
 |
لباب الاحیاء (احیاء العلوم کا خلاصہ) |
161 - 415
حضورنبئ پاک، صاحبِ لَولاک، سیّاحِ اَفلاک صلَّی اللہ تعالیٰ علیہ وآلہ وسلَّم کافرمانِ ذیشان ہے:''کیامیں تمہیں روزہ ، نماز او ر صدقہ سے افضل چیزکے بارے میں نہ بتاؤں؟''صحابۂ کرام رضی اللہ عنہم نے عرض کی:''جی ہاں۔''تو آپ صلَّی اللہ تعالیٰ علیہ وآلہ وسلَّم نے ارشاد فرمایا: ''آپس میں صلح کروانا۔''
(سنن ابی داؤد ،کتاب الادب ،باب فی اصلاح ذات البین ،الحدیث۴۹۱۹،ص۱۵۸۴)
اوروہ مسلمانوں کے عیبوں کوچھپائے ۔ان حقوق میں سے ایک یہ بھی ہے کہ وہ تہمت کی جگہوں سے بچے اورہرحاجت مندمسلمان کے لئے اس شخص کے پاس سفارش کرے جواس کی عزت کرتاہے اورگفتگوکرنے سے پہلے سلام کرے،جہاں تک ممکن ہومسلمان بھائی کی عزت اورمال کودوسرے کے ظلم سے بچائے۔
ان حقوق میں یہ بھی ہے کہ جب کسی شریرسے واسطہ پڑے تواسے برداشت کرے اوراس سے بچے اور ان حقوق میں یہ بھی ہے کہ مسلمانوں کی قبروں کی زیارت کرے اوران کے مُردوں کے لئے دعامانگے۔
جہاں تک پڑوسی کے حقوق کاتعلق ہے توجان لو!پڑوسی کے حقوق عام مسلمانوں کے حقوق سے بھی زیادہ ہے ۔
نبئ مُکَرَّم،نُورِ مُجسَّم، رسولِ اَکرم، شہنشاہ ِبنی آدم صلَّی اللہ تعالیٰ علیہ وآلہ وسلَّم کافرمانِ خوشبودارہے:''پڑوسی تین قسم کے ہیں: ایک وہ پڑوسی جس کاایک ہی حق ہے دوسراوہ ہے جس کے دوحق ہیں اورتیسراوہ جس کے تین حقوق ہیں اوروہ جس کے تین حقوق ہیں، وہ مسلمان اورقریبی رشتہ دارہے اور جس کے دوحق ہیں وہ مسلمان ہے اور جس کاایک حق ہے وہ مشرک ہے ۔ ''(حلیۃ الاولیاء ،عطا ء بن میسرۃ ،الحدیث۶۹۴۸،ج۵،ص۲۳۵)