(۱۷۹)۔۔۔۔۔۔ حضرتِ سیدنا ابوہریرہ رضی اللہ تعالی عنہ سے روایت ہے کہ ا ۤقائے مظلوم، سرورِ معصوم، حسنِ اخلاق کے پیکر،نبیوں کے تاجور، مَحبوبِ رَبِّ اکبرصلَّی اللہ تعالیٰ علیہ واٰلہٖ وسلّم نے فرمایا ،''مرد کا جماعت کے ساتھ نَماز ادا کرنا اس کے اپنے گھراور بازار میں نَماز ادا کرنے سے پچیس درجے افضل ہے ،اور اس کی وجہ یہ ہے کہ جب وہ اچھے طریقے سے وضو کرتاہے پھر مسجد کی طرف نکلتاہے اور اس کی نیت صرف نَماز کی ہوتی ہے تواس کے ہر قدم پر اللہ تعالی اس کا ایک درجہ بلند فرماتاہے اور اس کی ایک خطا کو معاف فرمادیتاہے۔ جب وہ نَماز پڑھ لیتاہے تو جب تک اپنی جگہ پر بیٹھا رہتاہے ،فرشتے اس کے لئے دعائے مغفر ت کرتے رہتے ہیں اور کہتے ہیں ،''اے اللہ عزوجل! اس کی مغفرت فرما ،اے اللہ عزوجل !اس پر رحم فرما۔'' اورجب تک تم میں سے کوئی نَماز کے انتظارمیں ہوتاہے نَماز ہی میں ہوتاہے ۔'' ایک اورروایت میں ہے کہ ''جب تک وہ کسی کو ایذا نہ پہنچائے یا کوئی بات نہ کرے توفرشتے عر ض کرتے رہتے ہیں کہ اے اللہ عزوجل !اس کی مغفرت فرما، اے اللہ عزوجل اس کی توبہ قبول فرما ۔''
