Brailvi Books
 |
جنت میں لے جانے والے اعمال |
(۷۵)۔۔۔۔۔۔ حضرتِ سیدنا ثوبان رضی اللہ تعالیٰ عنہ سے روایت ہے کہ آقائے مظلوم، سرورِ معصوم، حسنِ اخلاق کے پیکر،نبیوں کے تاجور، مَحبوبِ رَبِّ اکبرصلَّی اللہ تعالیٰ علیہ واٰلہٖ وسلّم نے فرمایا ''دین پر ثابت قدم رہو، تم ہر گز اس کی برکات شمار نہ کرسکو گے اور جان لو کہ تمہارے اعمال میں سب سے بہتر عمل نَماز ہے اور مومن ہی ہر وقت باوضو رہ سکتاہے۔''
(سنن ابن ماجہ ، کتا ب الطہارۃ،باب المحافظۃ علی الوضوء ، رقم ۲۷۷، ج ۱ ،ص ۱۷۸)
(۷۶)۔۔۔۔۔۔ حضرتِ سیدنا ربیعہ جرشی رضی اللہ تعالیٰ عنہ سے روایت ہے كہ نبی مُکَرَّم،نُورِ مُجسَّم، رسول اکرم، شہنشاہ ِبنی آدم صلَّی اللہ تعالیٰ علیہ واٰلہٖ وسلّم نے فرمایا،'' ثابت قدم رہو اور کیا ہی اچھا ہے اگر تم ثابت قدم رہو اور وضو پرہمیشگی اختیا رکرو کیونکہ تمہارے اعمال میں سب سے بہتر عمل نَماز ہے اور زمین سے خبرداررہو کہ یہ تمہاری اصل ہے اور اس زمین پر جوکوئی بھی اچھا یا برا عمل کریگا زمین اس کے بارے میں خبر دے گی۔''