(۶۰)۔۔۔۔۔۔ حضرتِ سیدنا ابو ہریرہ رضی اللہ تعالیٰ عنہ سے روایت ہے کہ تاجدارِ رسالت، شہنشاہِ نُبوت، مَخْزنِ جودوسخاوت، پیکرِ عظمت و شرافت، مَحبوبِ رَبُّ العزت،محسنِ انسانیت صلَّی اللہ تعالیٰٰ علیہ واٰلہٖ وسلّم قبرستان کی طرف تشریف لائے تو فرمایا،'' اے مومن قوم کے گھر ! تجھ پر سلامتی ہو اگر اللہ عزوجل نے چاہا توہم بھی تمہارے ساتھ ملنے والے ہیں، میں پسند کرتا ہو ں کہ ہم اپنے بھائیوں کو دیکھ لیتے۔''توصحابہ کرام علیھم الرضوان نے عرض کیا،'' یارسول اللہ صلی اللہ تعالیٰ علیہ وآلہ وسلم! کیاہم آپ صلی اللہ تعالیٰ علیہ وآلہ وسلم کے بھائی نہیں ہیں؟ ''فرمایا،'' تم میرے صحابہ ہو اور ہمارے بھائی وہ لوگ ہیں جوابھی تک پیدا نہیں ہوئے۔'' صحابہ کرام علیھم الرضوان نے عرض کیا،'' جو ابھی تک پیدا نہیں ہوئے، آپ صلی اللہ تعالیٰ علیہ وآلہ وسلم انہیں کیسے پہچانیں گے ؟''تو رسول اللہ صلی اللہ تعالیٰ علیہ وآلہ وسلم نے فرمایا، ''تمہارا کیا خیال ہے کہ اگر کسی شخص کے پاس ایک سیاہ گھوڑا ہو اوراس کے سیا ہ کندھوں کے درمیان ایک چمکدار نشان ہو تو کیا وہ اپنے گھوڑے کو نہ پہچان سکے گا؟'' عرض کیا ، ''کیوں نہیں، یا رسول اللہ صلی اللہ تعالیٰ علیہ وآلہ وسلم!'' تو فرمایا ''جب یہ میرے حوض پر آئیں گے تو ان لوگوں کے اعضاء وضوکے باعث چمکتے ہونگے اور میں حوض کوثر پر ان کی پیشوائی کیلئے موجود ہوں گا۔''
