Brailvi Books

(۱۳۶۹)۔۔۔۔۔۔ ام المومنین حضرتِ سیدتنا عائشہ صدیقہ رضی اللہ تعالیٰ عنہا سے روایت ہے کہ تاجدارِ رسالت، شہنشاہِ نُبوت، مَخْزنِ جودوسخاوت، پیکرِ عظمت و شرافت، مَحبوبِ رَبُّ العزت،محسنِ انسانيت صلَّی اللہ تعالیٰ علیہ واٰلہٖ وسلم نے فرمایا ، ''احتیاط تقدیر سے بے نیاز نہیں کرتی اور دعا نازل شدہ اورغیرنازل شدہ آفات سے نفع دیتی ہے او ر جب کوئی آفت نازل ہوتی ہے تواس کا سامنادعا سے ہوتاہے اور دونوں قیامت تک لڑتی رہتی ہیں۔''

    (مستدرک ، کتاب الدعا ء،باب الدعا ء ینفع مما نزل ،رقم ۱۸۵۶، ج۲، ص ۱۶۲)

(۱۳۷۰)۔۔۔۔۔۔ حضرتِ سیدنا سَلْمَان رضی اللہ تعالیٰ عنہ سے روایت ہے کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلَّی اللہ تعالیٰ علیہ واٰلہٖ وسلّم نے فرمایا،'' دعاتقدیر کو ٹال دیتی ہے اورنیکی عمر میں اضافہ کرتی ہے۔''

(ترمذی ،کتا ب القدر ،با ب ماجاء لایرد القدرالا الدعا، رقم ۲۱۴۶، ج۴، ص ۵۴)

(۱۳۷۱)۔۔۔۔۔۔ حضرتِ سیدنا ابن مسعود رضی اللہ تعالیٰ عنہ سے روایت ہے کہ سرکارِ والا تَبار، ہم بے کسوں کے مددگار، شفیعِ روزِ شُمار، دو عالَم کے مالک و مختار، حبیبِ پروردگارصلَّی اللہ تعالیٰ علیہ واٰلہٖ وسلّم نے فرمایا،'' اللہ عزوجل سے اس کے فضل کا سوال کیا کرو کیونکہ اللہ عزوجل اس بات کو پسند کرتا ہے کہ اس سے مانگاجائے اورخوشحالی کا انتظارکرنا سب سے افضل عبادت ہے ۔''

(ترمذی ،کتاب الدعوات، باب فی انتظار الفرج وغیر ذالک، رقم ۳۵۸۲، ج۵، ص ۳۳۳)

(۱۳۷۲)۔۔۔۔۔۔ حضرتِ سیدنا ابن عمررضی اللہ تعالیٰ عنہما سے روایت ہے کہ آقائے مظلوم، سرورِ معصوم، حسنِ اخلاق کے پیکر،نبیوں کے تاجور، مَحبوبِ رَبِّ اکبرصلَّی اللہ تعالیٰ علیہ واٰلہٖ وسلّم نے فرمایا،''تم میں سے جس کے لئے دعا کا دروازہ کھول دیا گیا اس کیلئے رحمت کے دروازے کھول دئیے گئے اور اللہ عزوجل سے عافیت کے سوال سے زیادہ پسندیدہ کسی چیز کا سوال نہیں کیا گیا اور بیشک دعا نازل شدہ اور نازل نہ ہونے والی آفتوں سے نفع دیتی ہے تواے اللہ عزوجل کے بندو! دعاکو اپنے اوپر لازم کرلو۔''

(ترمذی ،کتا ب الدعوات، رقم۳۵۵۹ ،ج۵، ص۳۲۲)