پچھلے صفحات میں درج شدہ احادیث بھی اس باب کے عنوان پر دلالت کرتی ہيں ،مزید احادیث درج ذیل ہیں۔
(۳۶)۔۔۔۔۔۔ حضرتِ سیدنا ابو ہریرہ رضی اللہ تعالیٰ عنہ سے روایت ہے کہ سرکارِ والا تَبار، ہم بے کسوں کے مددگار، شفیعِ روزِ شُمار، دو عالَم کے مالک و مختار، حبیبِ پروردگارصلَّی اللہ تعالیٰ علیہ واٰلہٖ وسلّم نے فرمایا ، '' مومن کے انتقال کے بعد اس کے عمل اور نیکیوں میں سے جو چیزیں اسے ملتی ہيں وہ یہ ہیں(۱) اس کاوہ علم جسے اس نے سکھایا اور پھیلایا اور(۲) نیک بیٹا جسے چھوڑکر مرا ،(۳) قرآن پاک جسے ورثہ میں چھوڑا، (۴) وہ مسجد جسے اس نے بنایا،(۵) مسافروں کے لئے کوئی گھر بنایا ہو ، (۶)کسی نہر کو جاری کیا ہو، (۷) وہ صدقہ جاریہ جسے اس نے حالت صحت اور زندگی میں اپنے مال سے دیا ہو۔''
