Brailvi Books
 |
جنت میں لے جانے والے اعمال |
421 - 736
(۱۱۸۳)۔۔۔۔۔۔ حضرتِ سیدنا جابر رضی اللہ تعالیٰ عنہ سے مروی ہے کہ خاتِمُ الْمُرْسَلین، رَحْمَۃُ الِّلْعٰلمین، شفیعُ المذنبین، انیسُ الغریبین، سراجُ السالکین، مَحبوبِ ربُّ العلمین، جنابِ صادق و امين صلَّی اللہ تعالیٰ علیہ واٰلہٖ وسلّم ہمارے پاس تشریف لائے اور فرمایا، ''لوگو! بیشک اللہ عزوجل کے فرشتے قافلے کی صورت میں سیر کرتے ہیں اور ذکر کی مجلسوں میں ٹھہرجاتے ہیں لہذاجنت کی کیاریوں میں سے کچھ نہ کچھ چن لیا کرو۔'' صحابہ کرام علیھم الرضوان نے عرض کیا،'' جنت کی کیاریاں کہاں ہیں؟''ارشاد فرمایا،'' ذکر کی محفلیں، لہذا صبح وشام اللہ عزوجل کے ذکر میں گزارواور اسے اپنے دل میں یاد کیا کرو، جو اپنا مرتبہ اللہ عزوجل کے نزدیک دیکھنا چاہتاہے تو وہ غور کرے کہ اس کے دل میں اللہ عزوجل کا کیا مرتبہ ہے؟ کیونکہ اللہ عزوجل بندے کو ویسا ہی مقام عطافرماتا ہے جیسا وہ اللہ عزوجل کےلیے اپنے ہاں رکھتا ہے( یعنی جتنا وہ اللہ عزوجل سے ڈرتا ہے اور اس کے احکامات پر عمل کرتا ہے )۔''
(ابویعلی ، مسند جابر بن عبداللہ ، رقم ۲۱۳۵، ج ۲ ، ص ۳۱۷)
(۱۱۸۴)۔۔۔۔۔۔ حضرتِ سیدنا انس بن مالک رضی اللہ تعالیٰ عنہ سے روایت ہے کہ تاجدارِ رسالت، شہنشاہِ نُبوت، مَخْزنِ جودوسخاوت، پیکرِ عظمت و شرافت، مَحبوبِ رَبُّ العزت،محسنِ انسانيت صلَّی اللہ تعالیٰ علیہ واٰلہٖ وسلّم نے فرمایا، ''جب تمہارا گزر جنت کی کیاریوں پرسے ہوتو اس میں سے کچھ نہ کچھ چن لیا کرو۔''صحابہ کرام علیھم الرضوان نے عرض کیا ،''جنت کی کیاریاں کیا ہیں ؟'' فرمایا ''ذکر کے حلقے ۔''
(تر مذی ، کتاب الدعوات ، باب ۸۷ ، رقم ۲۱ ۳۵ ، ج ۵ ، ص ۳۰۴ )