Brailvi Books
 |
جنت میں لے جانے والے اعمال |
412 - 736
(۱۱۵۳)۔۔۔۔۔۔ حضرتِ سیدنا ابوہریرہ رضی اللہ تعالیٰ عنہ سے روایت ہے کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلَّی اللہ تعالیٰ علیہ واٰلہٖ وسلّم نے فرمایا،'' اللہ عزوجل فرماتاہے کہ میں اپنے بندے کے گمان کے قریب ہوں جو وہ مجھ سے کرتاہے اور جب وہ میرا ذکر کرتاہے تو میں اس کے ساتھ ہوتاہوں ، اگر وہ مجھے تنہائی میں یا د کر تاہے تو میں بھی اسے تنہایا د کرتا ہوں اور اگر وہ میراذکر کسی مجمع میں کرتاہے تو میں اس سے بہتر مجمع میں اس کا ذکر کرتاہوں اگر وہ ایک بالشت مجھ سے قریب ہوتاہے تو میری رحمت اس سے ایک ہاتھ قریب ہوجاتی ہے اور اگر وہ ایک ہاتھ میرے قریب آتا ہے تو میری رحمت اس سے دو ہاتھ قریب ہوجاتی ہے اور اگر وہ میرے پاس چلتے ہوئے آتا ہے تومیر ی رحمت اس کے پاس دوڑتی ہوئی آتی ہے۔ ''
(بخاری، کتاب التو حید ،باب قول اللہ ویحذرکم اللہ نفسہ، رقم ۷۴۰۵ ،ج۴ ،ص ۵۴۱)
(۱۱۵۴)۔۔۔۔۔۔ حضرتِ سیدنا ابن عباس رضی اللہ تعالیٰ عنہما سے روایت ہے کہ حضورِ پاک، صاحبِ لَولاک، سیّاحِ افلاک صلَّی اللہ تعالیٰ علیہ واٰلہٖ وسلّم نے فرمایا کہ رب عزوجل فرماتا ہے ،'' اے ابن آدم ! جب تو تنہائی میں میرا ذکر کرتاہے تو میں بھی تنہا تیرا ذکر کرتا ہوں اورجب تو کسی مجمع میں میرا ذکر کرتاہے تو میں اس مجمع سے بہتر مجمع میں تیرا ذکر کرتاہوں۔''
( الترغیب والترہیب ،کتاب الذکرو الدعاء ، التر غیب فی الا کثار من ذکر اللہ ،رقم ۳، ج۲، ص ۲۵۲)