Brailvi Books

(۸۸۸)۔۔۔۔۔۔ حضرتِ سیدنا حسن بن علی رضی اللہ تعالی عنہما سے روایت ہے کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلَّی اللہ تعالیٰ علیہ واٰلہٖ وسلّم نے فرمایا،''جو ثواب کی امید پر خوشدلی سے قربانی کرے تو وہ قربانی اس کے لئے جہنم سے حجاب ہوگی۔''

    (مجمع الزوائد ،کتاب الاضاحی ،باب فضل الاضحیہ ،رقم ۵۹۳۷، ج۴ ،ص ۹)

(۸۸۹)۔۔۔۔۔۔ حضرتِ سیدنا ابن عباس رضی اللہ تعالی عنہما سے مروی ہے کہ حضورِ پاک، صاحبِ لَولاک، سیّاحِ افلاک صلَّی اللہ تعالیٰ علیہ واٰلہٖ وسلّم نے فرمایا،''عید کے دن قربانی میں خرچ کرنااللہ عزوجل کو سب سے زیادہ محبوب ہے۔ ''

(معجم کبیر ،مسند ابن عباس ،رقم ۱۰۸۹۴ ،ج۱۱، ص ۱۵)

(۸۹۰)۔۔۔۔۔۔ حضرتِ سیدنا زید بن ارقم رضی اللہ تعالی عنہ فرماتے ہیں کہ صحابہ کرام علیہم الرضوان نے عرض کیا ،'' یارسول اللہ صلَّی اللہ تعالیٰ علیہ واٰلہٖ وسلّم !یہ قربانیاں کیا ہیں؟'' آپ نے ارشاد فرمایا،'' تمہارے باپ ابراہیم علیہ السلام کی سنت ہیں ۔'' صحابہ کرام رضی اللہ عنہم نے عرض کیا ،''یارسول اللہ صلی اللہ علیہ وسلم! ان میں ہمارے لئے کیا ثواب ہے؟ ''فرمایا،'' ہربال کے بدلے ایک نیکی ہے ۔''عرض کیا ،''اور اُون میں ؟''فرمایا،'' اس کے ہربال کے بدلے بھی ایک نیکی ہے۔''

(ابن ماجہ ،کتاب الاضاحی ،باب ثواب الاضحیہ ،رقم ۳۱۲۷ ،ج۳ ،ص ۵۳۱)