(۸۷۸)۔۔۔۔۔۔ حضرتِ سیدنا اَنس بن مالک رضی اللہ تعالی عنہ سے بھی ویسی ہی روایت منقول ہے جیسی روایت پچھلے صفحات میں حضرت سیدنا ابن عمر رضی اللہ عنہ کے حوالے سے گزری ،لیکن اس میں یہ الفاظ ہیں کہ رسول اکرم صلَّی اللہ تعالیٰ علیہ واٰلہٖ وسلّم نے فرمایا، ''اور جہاں تک تمہارے عرفات میں وقوف کرنے کی بات ہے تو اللہ عزوجل عرفات والوں پر تَجَلِّی فرماکرارشاد فرماتاہے،'' میرے بندے غبار آلودپراگندہ سر ہوکر میرے پاس ہروادی سے سفر کرکے آئے ہیں ۔''پھر ملائکہ کے سامنے ان پرفخر فرماتا ہے ، لہذا! اگر تمہارے گناہ ریت کے ذرّات ، آسمان کے ستاروں اور سمندر اور بارش کے قطروں کے برابر بھی ہوں تو اللہ عزوجل تمہاری مغفرت فرمادے گا اور تمہاراجمار کی رمی کرنا تووہ تمہارے لئے اپنے رب عزوجل کے پاس تمہارے محتاجی کے وقت کے لئے ذخیرہ ہے اورسرمنڈوانے میں تمہارے سر سے گرنے والے ہر بال کے عوض قیامت کے دن ایک نورہوگا اوررہا' بیت اللہ کا طواف کرناتو جب تم طو اف کر کے واپس لوٹو گے توتم اپنے گناہوں سے ایسے نکل جاؤگے جیسے اس دن تھے جس دن تمہاری ماں نے تمہیں جنا تھا ۔''
(۸۷۹)۔۔۔۔۔۔ حضرتِ سیدنا ابن عمر رضی اللہ تعالی عنہما فرماتے ہیں کہ ایک شخص نے نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلَّی اللہ تعالیٰ علیہ واٰلہٖ وسلّم سے سوال کیا کہ'' شیطان کو کنکریاں مارنے میں ہمارے لئے کیا ثواب ہے؟'' توآپ نے فرمایا،''اسے (یعنی کنکریوں کو)تم انتہائی ضرورت کے وقت اپنے رب عزوجل کے پاس پاؤگے۔''
