ترجمہ کنزالایمان :اور جو اپنے گھر سے نکلااللہ ورسول کی طر ف ہجر ت کرتا پھر اسے موت نے آلیا تو اس کا ثواب اللہ کے ذمہ پر ہوگیا اور اللہ بخشنے والا مہربان ہے ( پ 5 ،النسآء: 100) ۔
(۸۲۳)۔۔۔۔۔۔ حضرتِ سیدنا ابن عباس رضی اللہ تعالیٰ عنہما فرماتے ہیں کہ ایک شخص شہنشاہِ مدینہ،قرارِ قلب و سینہ، صاحبِ معطر پسینہ، باعثِ نُزولِ سکینہ، فیض گنجینہ صلَّی اللہ تعالیٰ علیہ واٰلہٖ وسلّم کے ساتھ کھڑا تھا کہ اچانک سواری سے گر کراسکی گردن ٹوٹ گئی۔ سرکارِ مدینہ صلی اللہ تعالیٰ علیہ وآلہ وسلم نے فرمایا،'' اسے پانی اوربیری کے پتوں کے ساتھ غسل دو اوراسے انہی کپڑوں میں کفناؤ اور اس کے سر کومت ڈھانپواور خوشبو نہ لگاؤ کیونکہ یہ قیامت کے دن تلبیہ پڑھتاہوا اُٹھے گا۔''
ایک روایت میں ہے کہ ایک شخص سرورِ کونین صلی اللہ تعالی علیہ وآلہ وسلم کے ساتھ حالتِ احرام میں تھا۔ اس کی اونٹنی نے اسے گراکر اسکی گر دن توڑدی اور وہ مرگیا۔ رسول اللہ صلی اللہ تعالی علیہ وآلہ وسلم نے فرمایا،'' اسے پانی اور بیری کے پتوں سے غسل دو۔''
ایک روایت میں ہے کہ رسول اللہ صلی اللہ تعالی علیہ وآلہ وسلم نے صحابہ کرام علیہم الرضوان کو حکم فرمایا ،'' اسے پانی اوربیری کے پتوں کے ساتھ غسل دیکر اس کا چہرہ (یا فرمایا) اس کا سر کھول دو کیونکہ یہ قیامت کے دن بلند آواز کے ساتھ تلبیہ پڑھتے ہوئے اٹھے گا۔''