Brailvi Books
 |
جنت میں لے جانے والے اعمال |
(۷۱۶)۔۔۔۔۔۔ حضرتِ سیدنا ابو ہریرہ رضی اللہ تعالی عنہ فرماتے ہیں کہ تاجدارِ رسالت، شہنشاہِ نُبوت، مَخْزنِ جودوسخاوت، پیکرِ عظمت و شرافت، مَحبوبِ رَبُّ العزت،محسنِ انسانيت صلَّی اللہ تعالیٰ علیہ واٰلہٖ وسلّم صحابہ کرام علیہم الرضوان کو حکم دینے کی بجائے رمضان کی راتوں میں قیام کرنے کی ترغیب دلاتے ہوئے فرمایا کرتے کہ جو رمضان میں ایمان اور نیتِ ثواب کے ساتھ قیام کریگا اس کے پچھلے تمام گناہ مٹادئیے جائیں گے۔''
(صحیح البخار ی، کتا ب صلاۃ التراویح، رقم ۲۰۰۸ ، ۲۰۰۹، ج۱، ص۶۵۸)
(۷۱۷)۔۔۔۔۔۔ حضرتِ سیدنا عبد الرحمن بن عوف رضی اللہ تعالی عنہ فرماتے ہیں کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلَّی اللہ تعالیٰ علیہ واٰلہٖ وسلّم نے رمضان کو دوسرے مہینوں پر فضیلت دیتے ہوئے ارشاد فرمایا،'' جو رمضان میں ایمان اور نیتِ ثواب کے ساتھ قیام کرے گا(یعنی عبادت کرے گا) گناہوں سے ایسے نکل جائے گا جیسے اس دن تھا جس دن اس کی ماں نے اسے جنا تھا ۔''
ایک روایت میں ہے کہ رسول اللہ صلی اللہ تعالی علیہ وآلہ وسلم نے فرمایا ، ''بیشک اللہ عزوجل نے رمضان کے روزے فرض کئے ہیں اور میں نے اس میں قیام کرنے کو تمہارے لئے سنت بنایا اور جس نے رمضان میں ایمان اور نیتِ ثواب کے ساتھ قیام کیا تو گناہوں سے ایسے نکل جائے گا جیسے اس دن تھا جس دن اس کی ماں نے اسے جنا تھا۔''