Brailvi Books

(۶۲۱)۔۔۔۔۔۔ حضرتِ سیدنااَنس رضی اللہ تعالی عنہ سے روایت ہے شہنشاہِ مدینہ،قرارِ قلب و سینہ، صاحبِ معطر پسینہ، باعثِ نُزولِ سکینہ، فیض گنجینہ صلَّی اللہ تعالیٰ علیہ واٰلہٖ وسلّم نے فرمایا،''اہلِ جنت میں سے ایک شخص قیامت کے دن اہل جہنم کو اوپر سے جھا نک کر دیکھے گا تو جہنمیوں میں سے ایک شخص اسے پکار کر کہے گا،'' اے فلا ں ! کیا تو نے مجھے پہچانا؟'' وہ جنتی شخص کہے گا،'' اللہ عزوجل کی قسم! میں نے تجھے نہیں پہچا نا تو کون ہے؟'' تو وہ کہے گا،'' میں وہی ہوں کہ جب تو دنیا میں میرے پاس سے گزرا تھا تو تو نے مجھ سے پانی مانگا تھااور میں نے تجھے پانی پلایا تھا۔'' تو وہ جنتی کہے گا ،'' میں نے تجھے پہچان لیا۔'' تو وہ کہے گا کہ'' میرے لیے اس نیکی کی وجہ سے اپنے رب عزوجل کی بارگا ہ میں شفا عت کرو ۔''

    چنانچہ وہ شخص اللہ عزوجل کی بارگاہ میں اس کا تذکرہ کرکے سوال کریگا اور کہے گا میں نے جہنم میں جھانکا تو مجھے ان میں سے ایک شخص نے پکا رکر کہا، ''کیاتونے مجھے پہچا نا؟'' تو میں نے کہا،'' اللہ عزوجل کی قسم! میں نے نہیں پہچانا کہ تُو کون ہے ؟'' تو اس نے کہا کہ'' میں وہی ہوں کہ جب تو دنیامیں میرے قریب سے گزرا تھا تو تُو نے مجھ سے پانی کاایک گھو نٹ مانگا تھا تو میں نے تجھے پانی پلایا تھا ، لھٰذا تو اپنے رب عزوجل کی بارگا ہ میں میری شفاعت کر، تو یا رب عزوجل! میری شفا عت اس کے حق میں قبول فرمالے۔'' پھر اللہ عزوجل اسے جہنم سے نکالنے کا حکم دے گا تو اسے جہنم سے نکال دیا جائے گا۔''