ترجمہ کنزالایمان :تو جو ایک ذرہ بھر بھلائی کرے اسے دیکھے گا اور جو ایک ذرہ بھر برائی کرے اسے دیکھے گا۔ (پ 30، الزلزال: 7،8 )
(۶۱۵)۔۔۔۔۔۔ حضرتِ سیدنا ابو ہریرہ رضی اﷲ تعالی عنہ سے روایت ہے کہ خاتِمُ الْمُرْسَلین، رَحْمَۃُ الِّلْعٰلمین، شفیعُ المذنبین، انیسُ الغریبین، سراجُ السالکین، مَحبوبِ ربُّ العلمین، جنابِ صادق و امين صلَّی اللہ تعالیٰ علیہ واٰلہٖ وسلّم نے فرمایا، ''ایک شخص کسی راستے سے گزررہا تھا کہ اسے شدید پیاس محسوس ہوئی تو اس نے قریب ہی ایک کنواں پایا وہ اس میں اترا اور پانی پی کر نکل آیا ۔اس نے وہاں ایک کتے کو دیکھا جو ہانپ رہا تھا اور پیاس کی وجہ سے کیچڑ کھا رہا تھا۔ اس نے سوچا کہ اسے بھی اتنی ہی پیاس لگی ہو گی جتنی مجھے لگی تھی۔پھر وہ کنویں میں اترا اور اپنے موزے میں پانی بھر کر اسے اپنے منہ میں دبایا اور اوپر آیا اور وہ پانی کتے کو پلادیا۔ اللہ عزوجل کو اس کا یہ عمل پسند آیااور اس کی مغفرت فرمادی۔ ''صحا بہ کرام نے عرض کیا،''یا رسول اللہ صلی اللہ علیہ وسلم!کیاہمارے لئے چوپایوں میں بھی ثواب ہے؟''فرمایا،'' ہر جان والی چیز میں ثواب ہے۔''
