Brailvi Books

(۵۸۸)۔۔۔۔۔۔ حضرتِ سیدنا ابوہریرہ رضی اللہ تعالی عنہ سے روایت ہے کہ خاتِمُ الْمُرْسَلین، رَحْمَۃُ الِّلْعٰلمین، شفیعُ المذنبین، انیسُ الغریبین، سراجُ السالکین، مَحبوبِ ربُّ العلمین، جنابِ صادق و امين صلَّی اللہ تعالیٰ علیہ واٰلہٖ وسلّم نے فرمایا، ''مجھ پر جنت میں سب سے پہلے داخل ہونے والے تین شخص اور سب سے پہلے جہنم میں داخل ہو نے والے تین شخص پیش کئے گئے، سب سے پہلے جنت میں داخل ہونے والوں میں ایک تو شہید ہے اور دوسرا وہ غلا م جس نے اپنے رب کی عبادت کی اور اپنے آقاکی خدمت میں کوئی کمی نہ چھوڑی اور تیسرا وہ عیال دا رجو پاکدامن ہو اور جہنم میں داخل ہونے والے پہلے تین شخص یہ ہیں،(۱)زبردستی بادشاہ بن جا نے والا (۲)وہ مالدار شخص جو اپنے مال میں سے اللہ عزوجل کا حق ادا نہیں کرتا (۳)متکبر فقیر ۔''

(التر غیب والترہیب،کتاب النکاح ،باب التر غیب فی التفقۃ علی الزوجۃ والعیال، رقم ۳ ، ج ۳، ص ۴۱ )

(۵۸۹)۔۔۔۔۔۔ حضرتِ سیدنا ثوبان رضی اللہ تعالی عنہ سے روایت ہے کہ تاجدارِ رسالت، شہنشاہِ نُبوت، مَخْزنِ جودوسخاوت، پیکرِ عظمت و شرافت، مَحبوبِ رَبُّ العزت،محسنِ انسانيت صلَّی اللہ تعالیٰ علیہ واٰلہٖ وسلّم نے فرمایا، ''جو مجھے اس بات کی ضمانت دے کہ کسی سے سوال نہ کر ے گا تومیں اسے جنت کی ضمانت دیتا ہوں۔''حضرتِ سیدنا ثوبان رضی اللہ تعالی عنہ فرماتے ہیں کہ میں نے عرض کیا کہ'' میں ضمانت دیتاہوں۔'' لہذاآپ رضی اللہ تعالی عنہ کسی سے کچھ نہ مانگا کرتے تھے اور ایک روایت میں ہے کہ اگر حضرتِ سیدنا ثوبان رضی اللہ تعالی عنہ گھوڑے پر سوار ہوتے اور آپ کا کوڑا نیچے گر جا تا تو کسی سے اٹھانے کے لئے نہ کہتے بلکہ گھوڑے سے نیچے اتر کر خود ہی کوڑا اٹھا تے تھے ۔''

 (ابن ماجہ ، کتاب الزکاۃ، باب کراھیۃ المسئلۃ،رقم ۱۸۳۷،ج ۲، ص ۴۰۱ )