Brailvi Books

(۵۲۴)۔۔۔۔۔۔ حضرتِ سیدنا سمرہ رضی اللہ تعالیٰ عنہ سے روایت ہے کہ نبی مُکَرَّم،نُورِ مُجسَّم، رسول اکرم، شہنشاہ ِبنی آدم صلَّی اللہ تعالیٰ علیہ واٰلہٖ وسلّم نے فرمایا ،''نَماز ادا کرو اور زکوٰۃ ادا کرو اور حج کرو اور عمرہ کرو اورثابت قدم رہو۔''

(طبرانی کبیر، کتاب الصدقات، رقم ۶۸۹۷،ج۷،ص ۲۱۶ )

(۵۲۵)۔۔۔۔۔۔ حضرتِ سیدنا عمرو بن مُرَّہ جُہْنِی رضی اللہ تعالی عنہ فرماتے ہیں کہ قضاعہ قبیلے سے ایک شخص شہنشاہِ مدینہ،قرارِ قلب و سینہ، صاحبِ معطر پسینہ، باعثِ نُزولِ سکینہ، فیض گنجینہ صلَّی اللہ تعالیٰ علیہ واٰلہٖ وسلّم کی بارگاہ میں حاضر ہوا اور عرض کیا،'' یارسول اللہ صلی اللہ علیہ وسلم !میں اس بات کی گواہی دیتا ہوں کہ اللہ کے سوا کوئی معبود نہیں اور آپ اللہ تعالیٰ کے رسول ہیں اور میں پانچ نَمازیں پڑھتا ہوں اوررمضان کے روزے رکھتاہوں اوراس میں قیام کرتاہوں اور زکوٰۃ ادا کرتا ہوں۔ '' تو سرورِ کونین صلی اللہ تعالی علیہ وآلہ وسلم نے فرمایا ، ''جو اِن اعمال پر مرے گاوہ صدیقین اور شہداء میں لکھا جائے گا ۔''

 (الترغیب والترہیب،کتاب الصدقات ، باب فی اداء الزکاۃ، رقم ۱۹، ج۱ ،ص ۳۰۲ )

(۵۲۶)۔۔۔۔۔۔ حضرتِ سیدنا ابن عباس رضی اللہ تعالی عنہماسے روایت ہے کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلَّی اللہ تعالیٰ علیہ واٰلہٖ وسلّم نے فرمایا، ''جو نَماز قائم کرے اور زکوٰۃ ادا کرے اوربیت اللہ کا حج کرے اور رمضان کے روزے رکھے اور مہمان کی مہمان نوازی کرے جنت میں داخل ہوگا۔''

  (المعجم الکبیر ، رقم ۱۲۶۹۲،ج۱۲، ص ۱۰۶ )