Brailvi Books

(۴۸۶)۔۔۔۔۔۔ حضرتِ سیدنا ابوہریرہ رضی اللہ تعالی عنہ سے روایت ہے کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلَّی اللہ تعالیٰ علیہ واٰلہٖ وسلّم نے فرمایا، ''تم شہداء میں کسے شمار کرتے ہو ؟'' صحابہ کرام رضی اﷲ تعالی عنہم نے عرض کیا جو اﷲ عزوجل کی راہ میں مارا جائے وہ شہید ہے تو نبئ اکرم صلی اللہ علیہ وآلہ وسلم نے فرمایا'' اس طرح تو میری امت میں شہید بہت کم ہوں گے۔ ''تو صحابہ کرام رضی اللہ عنہم نے عرض کیا'' تو پھر شہید کون ہے یارسول اﷲ صلی اللہ علیہ وسلم !'' فرمایا، ''جو اللہ عزوجل کی راہ میں مارا جائے وہ شہید ہے اور جو اللہ عزوجل کی راہ میں مر جائے وہ شہید ہے اور جو طاعون میں مبتلاء ہوکر مرجائے وہ بھی شہید ہے اور جو پیٹ کی بیماری میں مبتلاء ہو کر مرے وہ بھی شہید ہے''

    ابن مقسم نے فرمایا کہ میں گواہی دیتا ہوں کہ ابو صالح رضی اللہ عنہ نے یہ بھی فرمایا تھا کہ'' جو سمندر میں ڈوب کر مرے وہ بھی شہید ہے ۔''ایک اور روایت میں ہے کہ شہدا ء پانچ ہیں (۱)طاعون میں مبتلاء ہوکر مرنے والا (۲)پیٹ کی بیماری کے سبب مرنے والا (۳)سمندر میں ڈوب کر مرنے والا (۴) ملبے تلے دب کر مرنے والا۔( ۵) اللہ عزوجل کی راہ میں قتل کیا جانے والا۔