(۴۵۷)۔۔۔۔۔۔ حضرتِ سیدنا انس رضی اللہ تعالی عنہ فرماتے ہیں کہ ایک جنازہ گزرا تو اسکی اچھے لفظوں سے تعر یف کی گئی تو سرکارِمدینہ صلی اللہ تعالی علیہ وآلہ وسلم نے فرمایا کہ'' اس پر واجب ہوگئی ، اس پر واجب ہوگئی ، اس پر واجب ہوگئی۔'' پھر ایک جنازہ گزرا تو اسے برے لفظوں سے یاد کیا گیا تو رسول اللہ صلی اللہ علیہ وسلم نے فرمایا ،''اس پر واجب ہوگئی اس پر واجب ہوگئی اس پر واجب ہوگئی ۔''
حضرتِ سیدنا عمر بن خطاب رضی اللہ تعالی عنہ نے عر ض کیا ،'' یارسول اللہ صلَّی اللہ تعالیٰ علیہ واٰلہٖ وسلّم! میرے ماں باپ آپ پر قربان! ایک جنازہ گزرا اور اسے اچھے لفظوں میں یاد کیاگیا تو آپ صلی اللہ علیہ وسلم نے فرمایا کہ اس پر واجب ہوگئی اس پر واجب ہوگئی واجب ہوگئی پھر ایک جنازہ گزرا اسے برے لفظوں سے یاد کیا گیا تو آپ صلی اللہ علیہ وسلم نے فرمایا واجب ہوگئی واجب ہوگئی واجب ہوگئی ؟(یعنی یہ کیا ماجرا ہے؟)'' تو رسول ِاکرم صلی اللہ علیہ وسلم نے فرمایا،'' جب تم کسی میت کی تعریف کرتے ہو تو اس پر جنت واجب ہو جاتی ہے اور جب تم کسی میت کی برائی بیان کرتے ہو تو اس پر جہنم واجب ہوجا تی ہے ،تم لوگ زمین پر اللہ عزوجل کے گواہ ہو۔ ''